Innlent

Segir það verstu niðurstöðuna að kremja lífið úr flugvellinum

Kristján Már Unnarsson skrifar
Sigrún Björk Jakobsdóttir, framkvæmdastjóri innanlandsflugvalla Isavia, í viðtali á Reykjavíkurflugvelli í dag.
Sigrún Björk Jakobsdóttir, framkvæmdastjóri innanlandsflugvalla Isavia, í viðtali á Reykjavíkurflugvelli í dag. Sigurjón Ólason

Isavia telur sér ekki fært að verða við beiðni Reykjavíkurborgar um að afhenda flugvallarland í Skerjafirði til íbúðabygginga og varpar ábyrgðinni á Sigurð Inga Jóhannsson innviðaráðherra.

Fjallað var um málið í fréttum Stöðvar 2 en borgin vill byrja að byggja sem fyrst í Nýja Skerjafirði og er þessa dagana í óða önn að úthluta þar byggingarlóðum. Svæðið er hins vegar ennþá lokað innan flugvallargirðingar.

Þessa girðingu þarf að færa áður en borgin getur hafið byggingarframkvæmdir.Sigurjón Ólason

Deilt er um hvort fyrirhugað íbúðahverfi gangi í berhögg við samkomulag borgarstjóra og ráðherra um að á meðan flugvallarstæði sé kannað í Hvassahrauni skuli rekstraröryggi tryggt á Reykjavíkurflugvelli. 

Aðilar vitna til skýrslu hollenskra sérfræðinga um að hætta vegna sviptivinda frá nýju hverfi svo nálægt flugbrautum við ákveðnar aðstæður kalli á mildunarráðstafanir.

„Þær miða allar að því að draga úr hættu í flugi, sem þýðir það að flug verður bannað á þessum dögum sem þessar aðstæður verða þannig. Þannig eru mildunarráðstafanir til að draga úr hættu,“ segir Sigrún Björk Jakobsdóttir, framkvæmdastjóri Isavia innanlandsflugvalla.

Flugvallarsamkomulagið handsalað í nóvember 2019. Það gerir ráð fyrir því að rekstraröryggi Reykjavíkurflugvallar skuli tryggt á meðan nýtt flugvallarstæði í Hvassahrauni er kannað.Skjáskot/Stöð 2

Í bréfi til innviðaráðherra í gær vegna óskar borgarinnar um færslu flugvallargirðingarinnar segir Isavia:

„Félaginu er ekki fært að verða við þeirri beiðni nema að ráðherra staðfesti það að færsla girðingarinnar fari ekki gegn samkomulagi ríkis og borgar frá árinu 2019. Óskað er eftir skriflegri afstöðu Innviðaráðherra, sem ber faglega og pólitíska ábyrgð á rekstri og tilvist flugvallarins, til þeirrar beiðni,“ segir í niðurlagi bréfsins.

-Þið varpið ábyrgðinni á ráðherrann?

„Ábyrgðin er hans,“ svarar Sigrún Björk.

Hún leynir þó ekki þeirri skoðun sinni að bíða eigi eftir niðurstöðu um Hvassahraun eða annan kost.

„Byrja á því að ákveða hvar flugvöllur á að vera í framtíðinni fyrir suðvesturhornið, byggja hann upp og síðan að loka þessum. 

Þetta er versta hugsanlega niðurstaða að gera þetta svona; að kremja lífið úr þessum þannig að hann verði óstarfhæfur án þess að vera tilbúinn með aðra lausn,“ segir framkvæmdastjóri Isavia innanlandsflugvalla.

Hér má sjá frétt Stöðvar 2:


Tengdar fréttir

Innviðaráðuneytið í hart við borgina vegna Skerjafjarðar

Innviðaráðuneytið hefur vegna fyrirhugaðra framkvæmda í Skerjafirði tilkynnt borgarstjóra að hverskyns aðgerðir af hálfu borgarinnar sem skerða rekstraröryggi Reykjavíkurflugvallar séu í andstöðu við tveggja ára gamalt flugvallarsamkomulag samgönguráðherra og borgarstjóra vegna Hvassahrauns.

Atvinnuflugmenn brýna Isavia að verja rekstraröryggi flugvallarins

Öryggisnefnd Félags íslenskra atvinnuflugmanna varar við því að nýjar húsbyggingar í Skerjafirði skapi hættu fyrir flugvélar á Reykjavíkurflugvelli með ókyrrð og sviptivindum. Isavia er hvatt til að setja fótinn niður og tryggja rekstraröryggi flugvallarins.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.