Innlent

Borgin telur Nýja Skerjafjörð ekki trufla rekstur flugvallar

Kristján Már Unnarsson skrifar
Pavel Bartoszek, borgarfulltrúi Viðreisnar, er formaður skipulags- og samgönguráðs Reykjavíkurborgar.
Pavel Bartoszek, borgarfulltrúi Viðreisnar, er formaður skipulags- og samgönguráðs Reykjavíkurborgar. Egill Aðalsteinsson

Talsmenn borgarstjórnarmeirihlutans vilja hefja uppbyggingu Nýja Skerjafjarðar sem allra fyrst og hafna því að byggingar þar skerði rekstraröryggi Reykjavíkurflugvallar.

Í fréttum Stöðvar 2 var rifjað upp að vegna fyrirhugaðra framkvæmda í Skerjafirði tilkynnti Innviðaráðuneytið í bréfi til borgarstjóra í síðasta mánuði að hverskyns aðgerðir af hálfu borgarinnar, sem skerði rekstraröryggi vallarins, séu í andstöðu við tveggja ára gamalt flugvallarsamkomulag vegna Hvassahrauns.

Borgin hefur núna svarað ráðuneytinu þar sem hún fullyrðir að hvorki flugöryggi né rekstraröryggi vallarins eigi að vera stefnt í hættu. Ótvírætt sé að uppbygging nýja Skerjafjarðar gangi ekki í berhögg við samkomulagið.

Pavel Bartoszek, formaður skipulags- og samgönguráðs borgarinnar, vitnar í sérfræðinga geimferðastofnunar Hollands.

„Þeirra niðurstaða var sú að áhættan vegna vindbreytinga sé ásættanleg, eða viðráðanleg, og eigi ekki að koma í veg fyrir uppbyggingu hins nýja Skerjafjarðar,“ segir Pavel.

Séð yfir svæðið í Skerjafirði sem borgin áformar að leggja undir íbúðabyggð.

Niðurstaða Isavia, og einnig öryggisnefndar atvinnuflugmanna, sem einnig vitna til Hollendinganna, er að sviptivindar vegna nýrra bygginga á svæðinu við ákveðnar aðstæður kalli á mildunarráðstafanir, sem óhjákvæmilega skerði notkunarmöguleika vallarins.

„Þær er að mínu mati flugtæknilegs eðlis. Þær felast þá í því að ákveða í hvaða vindátt er lent eða með aukinni þjálfun flugmanna. En við teljum ekki að það sé með neinu móti hægt að lesa út úr þessum skýrslum að við eigum að hætta við eða bíða enn frekar með þessa uppbyggingu, sem við erum mjög spennt fyrir,“ segir Pavel.

Stefnan um nýtt íbúðahverfi á svæðinu hafi verið mörkuð í skipulagi.

„Þar sem munu í heild búa kannski um þrjú-fjögurþúsund manns. Þar verður nýr grunnskóli, frábært aðgengi fyrir gangandi og hjólandi. Þannig að við segjum bara: Áfram gakk með þetta verkefni.“

Fyrirhugað íbúðahverfi Nýja-Skerjafjarðar.Reykjavíkurborg

-Þið viljið ekki bíða þangað til niðurstaða kemur um Hvassahraun?

„Ég tel enga ástæðu til þess. Það vantar íbúðir í Reykjavík í dag. Við höfum enga ástæða til að bíða eftir því.

Enda gerir samkomulagið við ríkið um Hvassahraun ekki ráð fyrir því að það sé beðið eftir niðurstöðunni með Hvassahraun þangað til ráðist er í þessa uppbyggingu. Þvert á móti,“ svarar Pavel Bartoszek.

Flugmálayfirvöld hyggjast svara borginni og þegar það svar liggur fyrir, sennilega í kringum næstu mánaðamót, ætti að skýrast hvort þau afhendi borginni landið eða hyggist halda því áfram innan flugvallargirðingar.

Hér má sjá frétt Stöðvar 2:

Reykjavíkurflugvöllur Borgarstjórn Fréttir af flugi Skipulag Samgöngur Reykjavík

Tengdar fréttir

Innviðaráðuneytið í hart við borgina vegna Skerjafjarðar

Innviðaráðuneytið hefur vegna fyrirhugaðra framkvæmda í Skerjafirði tilkynnt borgarstjóra að hverskyns aðgerðir af hálfu borgarinnar sem skerða rekstraröryggi Reykjavíkurflugvallar séu í andstöðu við tveggja ára gamalt flugvallarsamkomulag samgönguráðherra og borgarstjóra vegna Hvassahrauns.

Atvinnuflugmenn brýna Isavia að verja rekstraröryggi flugvallarins

Öryggisnefnd Félags íslenskra atvinnuflugmanna varar við því að nýjar húsbyggingar í Skerjafirði skapi hættu fyrir flugvélar á Reykjavíkurflugvelli með ókyrrð og sviptivindum. Isavia er hvatt til að setja fótinn niður og tryggja rekstraröryggi flugvallarins.

Segir nýtt íbúðahverfi skerða rekstraröryggi flugvallarins

Óvíst er hvort Isavia muni afhenda Reykjavíkurborg svæði í Skerjafirði í vor til byggingar nýs íbúðahverfis án frekari rannsókna. Framkvæmdastjóri innanlandsflugvalla Isavia segir húsbyggingar þar hafa umtalsverð áhrif á rekstraröryggi Reykjavíkurflugvallar.

Borgin tekur tvær sneiðar til viðbótar af flugvellinum

Nýtt aðalskipulag Reykjavíkur gerir ráð fyrir að tvær sneiðar verði skornar af Reykjavíkurflugvelli á næstu þremur árum og að vellinum verði svo endanlega lokað eftir áratug, árið 2032.

Segir nýja byggð í Skerjafirði atlögu gagnvart flugvellinum

Áform borgarstjórnarmeirihlutans um nýja byggð í Skerjafirði, sem kynnt verða á morgun, eru atlaga að Reykjavíkurflugvelli og skemmdarverk af stærstu gráðu, að mati Vigdísar Hauksdóttur, borgarfulltrúa Miðflokksins.

Mest lesið


Fleiri fréttir

Sjá meira


×

Mest lesið