Menning

„Það tengja allir við sína sundlaug“

Dóra Júlía Agnarsdóttir skrifar
Listamaðurinn Unnar Ari setur allar sundlaugar landsins á vegg fyrir sýningu sína SundForm á HönnunarMars.
Listamaðurinn Unnar Ari setur allar sundlaugar landsins á vegg fyrir sýningu sína SundForm á HönnunarMars. Instagram: @unnar.ari.baldvinsson

Myndlistarmaðurinn Unnar Ari opnar sýninguna Sundform á HönnunarMars þann fjórða maí næstkomandi. Á sýningunni verða 105 prentverk eftir Unnar af hverri einustu sundlaug landsins. Blaðamaður heyrði í Unnari og fékk að heyra nánar frá þessu skapandi verkefni.

Hvaðan kviknaði hugmyndin að verkefninu Sundform?

Hugmyndin kom þegar ég var einhvern tímann að surfa á google maps og sá sundlaugina á Seltjarnarnesi. 

Formið og liturinn heillaði mig strax og fannst mér merkilegt hvað laugin var öðruvísi en þegar maður situr í heita pottinum. 

Hugmyndin af SundForm kom strax og mig langaði að sjá allar laugarnar saman á einum vegg.

Ert þú mikill sundmaður?

Já ég fer í sund mjög oft, bæði til að synda og slaka.

Hefur verkefnið verið lengi í bígerð og hvernig hefur ferlið gengið?

Verkefnið er búið að vera í vinnslu síðan í byrjun 2020 en fékk svo styrk frá Hönnunarmiðstöð seinna á því ári. 

Það þurfti að taka ljósmyndir af öllum laugunum á landinu með dróna til þess að formin væru nógu skýr, myndirnar eru síðan teiknaðar út frá loftmyndum í ákveðnu litakerfi svo maður geti greint auðveldlega hvað er hvað.

Hefur þú tekið þátt í Hönnunarmars áður?

Nei þetta er fyrsta skipti sem ég tek þátt.

Hvar verður sýningin?

Sýningin verður í Bíó Paradís og opnar 4. maí. Það verður líka hægt að skoða allar laugarnar á sundform.is.

Hvaðan sækir þú almennt innblástur í listsköpun þína?

Ég skoða mikið form og andstæð form, hvaða hlutverk hefur ramminn utan um mynd og samspilið þar á milli. 

Litir eru líka mikill innblástur og stundum pæli ég aðeins of mikið í hvaða litur er á sjónum eða hvaða tónn af grænum eða gulum er í grasinu.

Annað sem þú vilt taka fram?

Það sem mér finnst svo skemmtilegt við SundForm eða sundlaugar yfir höfuð er að það tengja allir við sína laug, það eru svo margar sundlaugar á íslandi að fólk í mismunandi hverfum eða landshlutum hefur stundum mjög sterkar skoðanir á hvaða laug er betri og af hverju sumir fara aldrei í þessa sundlaug. Til dæmis er ég af Nesinu og konan mín úr Vesturbænum og áður en við eignuðumst börn þá fórum við daglega í sund og það var alltaf umræða um hvort við ættum að fara í Seltjarnarneslaugina eða Vesturbæjarlaugina. 

Einu sinni vorum við það ósammála að við fórum í sitthvora laugina því hvorugt okkar gat gefið eftir, hittumst bara heima klukkan 14:00.

HönnunarMars 2022 fer fram 4. til 8. maí. Alla dagskránna má finna á vef hátíðarinnar

Frítt er inn á alla viðburði fyrir utan DesignTalks ráðstefnuna í Hörpu. HönnunarMars er opinn öllum og dagskráin er fjölbreytt svo allir ættu að geta fundið eitthvað við sitt hæfi.  

Hér má finna alla okkar umfjöllun um HönnunarMars 2022


Tengdar fréttir




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.