Dagný og West Ham úr leik í FA-bikarnum

Ellen White kom City yfir eftir rúmlega tuttugu mínútna leik áður en Chloe Kelly tvöfaldaði forystuna á 37. mínútu.

Lisa Evans minnkaði muninn fyrir West Ham stuttu fyrir hálfleik og staðan var því 2-1 City í vil þegar gengið var til búningsherbergja.

Það var svo Lauren Hemp sem kom City aftur í tveggja marka forystu með marki á 66. mínútu og hún skoraði einnig fjórða mark liðsins í uppbótartíma og gerði þar með út um leikinn.

Dagný og stöllur þurftu því að sætta sig við 4-1 tap og liðið er úr leik í FA-bikarnum. Manchester City er hins vegar á leið í úrslitaleikinn þar sem liðið mætir annað hvort Arsenal eða Chelsea.