Innlent

Bjarni vill að Ríkisendurskoðun fari yfir útboðið

Tryggvi Páll Tryggvason skrifar
Bjarni Benediktsson varði útboðsfyrirkomulagið á þingi í dag.
Bjarni Benediktsson varði útboðsfyrirkomulagið á þingi í dag. Vísir/VIlhelm

Bjarni Benediktsson, fjármála- og efnahagsráðherra, telur að það sé „langbest“ að Alþingi fái Ríkisendurskoðun til þess að fara yfir framkvæmd nýafstaðins útboðs á stórum hlut ríkisins í Íslandsbanka.

Bjarni hefur verið harðlega gagnrýndur fyrir framkvæmd útboðsins í síðasta mánuði, þar sem 22,5 prósent hlutur í eigu ríkisins í Íslandsbanka var boðinn út.

Mikil eftirspurn var eftir hlutum í bankanum í útboðinu en alls buðu 430 fjárfestar í 50 milljón hluti þar sem verð á hverjum hlut var 117 krónur eða fjórum prósentum lægra en markaðsgengi. Þeir voru seldir fyrir samtals 52,7 milljarða króna.

Lífeyrissjóðir, fjárfestingasjóðir og fjölmargir þekktir aðilar úr fjármálaheiminum innanlands voru á meðal kaupenda, þar á meðal faðir Bjarna, fjárfestirinn Benedikt Sveinsson.

Bjarni sat fyrir svörum um útboðið í óundirbúnum fyrirspurnartíma á Alþingi í dag. Halldóra Mogensen, þingmaður Pírata gagnýndi fyrirkomulag útboðsins harðlega þar. Þar vísaði hún í að fyrir útboðið hafi verið gefið út að markmið þess væri að laða að langtímafjárfestingu í bankanum.

„Þess í stað var um að ræða nokkurs konar villta vestur þar sem fimm sölufyrirtæki tóku kvöldstund í að hringja í sína uppáhalds fjárfesta. Niðurstaðan er afar sundurleitur listi fjárfesta þar sem einhverjir tugir einstaklingar eru að fjárfesta fyrir brot úr prósenti,“ sagði Halldóra sem spurði Bjarna hvað hafi breyst sem varð til þess að litlum fjárfestum hafi verið hleypt að borðinu.

„Enginn handvalinn, þetta var opið útboð“

„Það var engum sérstaklega hleypt að í þessu ferli,“ svaraði Bjarni. „Heldur var ljóst frá upphafi að þeir sem teldust hæfir fjárfestar máttu taka þátt.“

Halldóra Mogensen þingmaður Pírata gagnrýndi útboðsfyrirkomulagið.Vísir/Vilhelm

„Allir þeir sem að gáfu sig fram lýstu áhuga á að taka þátt í þessu útboði sem var opinbert af hálfu Bankasýslunnar og uppfylltu skilyrðin að vera hæfir, annars vegar, og voru reiðubúnir að greiða verðið sem Bankasýslan lagði til og ég samþykkti, þeir fengu að taka þátt. Enginn handvalinn, þetta var opið útboð,“ sagði Bjarni.

Sagði hann jafn framt að hann teldi það best að Ríkisendurskoðun myndi fara yfir framkvæmd útboðsins.

„Vegna þeirrar gagnrýni sem fram hefur komið þá held ég að það sé langbest, til þess einmitt, að tryggja að það sé ekkert í skugganum og það sé bara vel farið yfir þá framkvæmd sem við höfum hér ný gengið í gegnum að við fáum Ríkisendurskoðun til að taka út framkvæmd útboðsins og fara yfir það fyrir þingið með hvaða hætti lög og fyrirmæli voru framkvæmd við þetta útboð. Ég tel að miðað við það sem ég veit að það muni koma vel út fyrir alla framkvæmdina,“ sagði Bjarni.

Klippa: Bjarni ræðir útboðið í Íslandsbanka


Tengdar fréttir

Hluthafar Íslandsbanka koma úr ólíkum áttum

Björn Bragi Arnarson, sjónvarpsmaður og grínisti, er á meðal þeirra fjárfesta sem fengu boð um að kaupa í Íslandsbanka. Björn Bragi keypti fyrir sautján og hálfa milljón króna í Íslandsbanka í gegnum félag sitt Bananalýðveldið. Hann á í dag 0,03 prósenta hlut í bankanum og er einn af fjölmörgum sem keyptu hlut í bankanum í nýafstöðunu útboði.

Krist­rún segir traustið á sölu­ferlinu horfið

Kristrún Frostadóttir þingmaður Samfylkingarinnar segir að traustið á söluferli Íslandsbanka sé horfið. Í aðsendri grein á Vísi spyr hún hver eigi að bera ábyrgð á því en í gær var birtur listi þeirra sem fengu að kaupa hlutabréf í bankanum á afslætti, sem vakið hefur mikla athygli.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×