Viðskipti innlent

Hluthafar Íslandsbanka koma úr ólíkum áttum

Kolbeinn Tumi Daðason skrifar
Fannar Ólafsson fjárfestir og fyrrverandi körfuboltakempa, Björn Bragi Arnarson grínisti og Þórður Már Jóhannesson fjárfestir eru á meðal fjölmargra hluthafa í Íslandsbanka og þar með eigenda.
Fannar Ólafsson fjárfestir og fyrrverandi körfuboltakempa, Björn Bragi Arnarson grínisti og Þórður Már Jóhannesson fjárfestir eru á meðal fjölmargra hluthafa í Íslandsbanka og þar með eigenda.

Björn Bragi Arnarson, sjónvarpsmaður og grínisti, er á meðal þeirra fjárfesta sem fengu boð um að kaupa í Íslandsbanka. Björn Bragi keypti fyrir sautján og hálfa milljón króna í Íslandsbanka í gegnum félag sitt Bananalýðveldið. Hann er einn af fjölmörgum sem keyptu hlut í bankanum í nýafstöðunu útboði.

Af fjárfestunum 209 sem keyptu hlut í bankanum voru 190 innlendir og nítján erlendir. Flestir nýir hluthafar eru einkafjárfestar, eða alls 140 og keyptu þeir samtals fyrir 16,1 milljarð króna í bankanum. Það svarar til 30,6 prósent þeirrar fjárhæðar sem greidd var í útboðinu.

Þar á eftir koma lífeyrissjóðir, sem voru 23, og greiddu þeir samtals 19,5 milljarða fyrir hluti í bankanum, eða 37,1 prósent þeirrar fjárhæðar sem greidd var.

Íslandsbanki er nú að minnihluta í eigu ríkisins eftir tvö söluferli í ár og í fyrra. Fyrir söluna fór íslenska ríkið með 65 prósent hlut í Íslandsbanka. Í dag fer ríkið með 42,5 prósent hlut í bankanum.vísir/vilhelm

Þar á eftir koma aðrir fjárfestar, sem voru fjórtán, sem keyptu fyrir 3,5 milljarða eða 6,7 prósent, og svo verðbréfasjóðir, sem voru þrettán og keyptu fyrir 5,6 milljarða eða 10,6 prósent.

Af fjárfestunum 209 sem keyptu hlut í bankanum voru 190 innlendir og nítján erlendir.

Guðbjörg, Sigurður Gísli og Halldór Kristmanns

Fjölmargir þekktir aðilar úr fjármálaheiminum innanlands voru á meðal kaupenda. Guðbjörg Matthíasdóttir, aðaleigandi Morgunblaðsins, keypti fyrir 486 milljónir í gegnum eignarhaldsfélagið Kristinn ehf. 

Jakob Valgeir Flosason, framkvæmdastjóri Jakobs Valgeirs ehf.Arnar Halldórsson

Einkahlutafélagið Jakob Valgeir ehf. keypti hlut í bankanum fyrir tæpan milljarð króna, eða 936 milljónir, og eignaðist þar með 1,7778 prósenta hlut í Ísandsbanka. Björg Hildur Daðadóttir, eiginkona Jakobs Valgeirs, á tæp 69 prósent í félaginu og bæðurnir Guðbjartur og Brynjólfur Flosasynir, bræður Jakobs útgerðarmanns, hin 30 prósentin. Félagið gerir út þrjú skip og rekur fiskvinnslu í Bolungarvík.

Eignarhaldsfélagið Hof, sem er í eigu bræðranna Jóns og Sigurðar Gísla Pálmasona, keypti 0,2016 prósenta hlut í bankanum fyrir rúmar 106 milljónir króna. FÓ Eignarhald, sem er í eigu körfuboltamannsins Fannars Ólafssonar, keypti í bankanum fyrir tæpar 180 milljónir króna.

Halldór Kristmannsson, sem var lengi aðstoðarmaður Róberts Wessman forstjóra Alvogen en stendur nú í deilum við, keypti fyrir 69 milljónir króna.

Benedikt, Jón Ásgeir og Þórður Már

Fjárfestingafélagið Pund, sem er alfarið í eigu Hannesar Hilmarssonar stjórnarformanns Air Atlanta, keypti fyrir tæpar 270 milljónir króna. Félagið Brimgarðar, sem er í eigu Eggerts Árna, Gunnars Þórs, Halldórs Páls og Guðnýjar Eddu Gíslabarna, og Coldrock Investments limited eigenda Mata hf., keypti  fyrir rúmar 472 milljónir króna.

Þórður Már Jóhannesson fjárfestir og fyrrverandi forstjóri Straums fjárfestingabanka á hlut í bankanum í gegnum tvö félög, fyrir rúmlega hundrað milljónir króna. Þórður Már steig til hliðar sem forstjóri Straums á dögunum eftir frásögn Vítalíu Lazarevu af samskiptum hennar við fjóra karlmenn í heitum potti, þeirra á meðal Þórð Má.

Benedikt Sveinsson, fjárfestir og faðir Bjarna Benediktssonar fjármálaráðherra, keypti fyrir 55 milljónir króna í gegnum félag sitt Hafsilfur. Jón Sigurðsson fjárfestir, sem var á sínum tíma forstjóri FL Group, keypti fyrir 175 milljónir í gegnum félagið Stoðir.

Skel fjárfestingarfélag, áður Skeljungur, fékk að kaupa í Íslandsbanka fyrir 450 milljónir króna. Helmingur félagsins er í eigu eignarhaldsfélagsins Skeljar hvar Jón Ásgeir Jóhannesson er stjórnarmaður og hluthafi.

Keyptu fyrir 225 milljónir

Þá keypti Lyf og heilsa í útboðinu fyrir 225 milljónir króna. Lyf og heilsa er í eigu Jóns Hilmars Karlssonar í gegnum eignarhaldsfélagið Toska. Jón Hilmar er sonur Karls Wernerssonar sem var sakfelldur í Milestone-málinu og dæmdur í þriggja og hálfs árs fangelsi.

Héraðssaksóknari hefur haft til rannsóknar tilfærslu á Lyf og heilsu frá Karli til sonar hans daginn eftir að Karl var sakfelldur í Milestone-málinu. Skiptastjóri þrotabús Karls höfðaði mál á hendur Karli og vildi rifta viðskiptunum.

Í síðustu viku var samningum um afsal þriggja verðmætra eigna frá Karli til félags í eigu sonar hans rift. Landsréttur staðfesti þá dóm Héraðsdóms Reykjavíkur um heimild þrotabús Karls til riftunar þriggja afsala til handar Faxa ehf. sem sonur hans, Jón Hilmar Karlsson, eignaðist eftir að Karl var dæmdur í fangelsi. Faxar er hluti af félagasamsteypu sem á Lyf og heilsu.

Húsleit var gerð á heimili Karls þann 23. mars, daginn eftir útboðið í Íslandsbanka. Karl sagði sjálfur frá húslseitinni í yfirlýsingu til fjölmiðla en vildi ekki ræða málið nánar þegar eftir því var leitað.


Tengdar fréttir

Krist­rún segir traustið á sölu­ferlinu horfið

Kristrún Frostadóttir þingmaður Samfylkingarinnar segir að traustið á söluferli Íslandsbanka sé horfið. Í aðsendri grein á Vísi spyr hún hver eigi að bera ábyrgð á því en í gær var birtur listi þeirra sem fengu að kaupa hlutabréf í bankanum á afslætti, sem vakið hefur mikla athygli.





Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×