Innlent

Hnýtur um viðbrögð borgarstjóra og segir framtíð íþrótta bjarta

Kolbeinn Tumi Daðason skrifar
Bjarni Benediktsson fjármála- og efnahagsráðherra segir að ríkið geri ráð fyrir nýjum þjóðarleikvangi í máli sínu.
Bjarni Benediktsson fjármála- og efnahagsráðherra segir að ríkið geri ráð fyrir nýjum þjóðarleikvangi í máli sínu. Vísir/Vilhelm

Bjarni Benediktsson fjármála- og efnahagsráðherra segir að til þess að lausn fáist í umræðunni um nýjan þjóðarleikvang þurfi að ljúka samtali sem hófst árið 2018 um að samkomulag þyrfti að nást milli ríkis og borgar um fjárhagslegt framlag. Engar fjárhagslegar skuldbindingar varðandi þjóðarleikvang er að finna í fjármálaáætlun ríkisstjórnarinnar fyrir árin 2023-2027.

Dagur B. Eggertsson borgarstjóri sagðist í samtali við Vísi í dag vera mjög hissa á því hvernig þjóðarleikvangurinn væri afgreiddur í áætluninni. Tveir milljarðar króna hefðu verið til hliðar af borginni fyrir nýjan leikvang. Ef ríkið ætlaði ekki að skuldbinda sig til næstu ára þá yrðu peningarnir nýttir í nýtt íþróttahús fyrir íþróttafélögin í Laugardal, Ármann og Þrótt.

„Þessi fjármálaáætlun ríkisstjórnarinnar setur stórt spurningamerki við það hvort verið sé að segja að ekkert muni gerast í þessum málum næstu fimm árin. Ég mun kalla eftir skýringum. Reykjavíkurborg hefur verið alveg skýr hvað það varðar að þessi máli þurfi að skýrast núna,“ sagði Dagur.

Bjarni grípur boltann á lofti í færslu á Facebook. Hann segir að frá 2018 hafi verið gengið út frá því að samkomulag þyrfti að nást milli ríkis og borgar um fjárhagslegt framlag og aðra þætti.

„Of hægt hefur gengið að leiða til lykta þessi mál og ekki hjálpaði að fá heimsfaraldur í millitíðinni. Af þessum sökum hafa allar áætlanir raskast,“ segir Bjarni.

Honum sé ekki kunnugt um að endanlegt samkomulag um framlag borgarinnar hafi náðst.

„Þannig kom fram á síðasta fundi sem ég sat um málið að borgarstjóri teldi ljóst að það væri ekki vilji innan meirihlutaflokkanna að styðja við framlög til þjóðarleikvangs. Áherslan ætti að vera á barna- og unglingastarf.“

Þá rifjar Bjarni upp tíst frá borgarstjóra í desember 2015 þar sem Dagur sagðist gera ráð fyrir að ríkið borgaði þjóðarleikvanga. Borgin greiddi annað.

„Í millitíðinni hefur reyndar komið fram að nýr menntamálaráðherra segist vera í samtali um kostnaðarskiptingu við borgina og nú er minnt á að Reykjavík hafi tekið frá 2 milljarða í tengslum við þjóðarleikvanga. Þó var það ekki gert í neinu samkomulagi við ríkið,“ segir Bjarni.

Þá segir hann ranga fullyrðingu að ekki sé minnst á þjóðarleikvanga í fjármálaáætlun. Í áætluninni komi fram að gert sé ráð fyrir leikvangi á næstu árum.

Ýmislegt sem ekki liggur fyrir

Þá komi fram að óráðstafað fjárfestingasvigrúm fari vaxandi eftir því sem líður á áætlunartímabilið.

„Slíkt svigrúm getur einmitt nýst til þess að klára fjármögnun mannvirkja eins og þjóðarleikvanga, sem á þessum tímapunkti liggur reyndar ekki endanlega fyrir hvar eiga að rísa og að hvaða marki borgin eða aðrir ætli að taka þátt í að fjármagna. Þegar það liggur fyrir má fara í að hanna mannvirkin og ráðast í annan nauðsynlegan undirbúning, m.a. að sækja um leyfi og breytingar á skipulagi, allt þættir sem hafa átt það til að taka einhver ár.“

Ríkið geri ráð fyrir málinu í sínum áætlunum og af þeirri ástæðu sé ekki ástæða til annars en að vera bjartsýnn á framtíð íþróttanna í landinu.


Tengdar fréttir

Borgar­stjóri mjög undrandi og segir borgina ekki geta beðið

Dagur B. Eggertsson borgarstjóri Reykjavíkur segist vera mjög undrandi á því að ekkert sé minnst á þjóðarleikvanga í nýrri fjármálaáætlun ríkisstjórnarinnar. Hann segist munu leita skýringa og að fjárhæðir, sem borgin hafi lagt til hliðar vegna nýs þjóðarleikvangs, verði nýttir í nýtt íþróttahús fyrir Þrótt og Ármann í Laugardal, sé það raunin að ríkið hafi ákveðið fresta því að leggja fjármuni til nýrra þjóðarleikvanga.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.