Erlent

Fangelsisvistin lengd um níu ár og Navalní færður í hámarksöryggisfangelsi

Samúel Karl Ólason skrifar
Alexei Navalní í dómsal í morgun.
Alexei Navalní í dómsal í morgun. EPA/YURI KOCHETKOV

Alexei Navalní, pólitískur andstæðingur Vladimírs Pútín, forseta Rússlands, hefur verið dæmdur í níu ára fangelsi og verður færður í hámarksöryggisfangelsi. Hann var í morgun dæmdur sekur um stórfellt fjármálamisferli í tengslum við samtök hans gegn spillingu í Rússlandi sem yfirvöld hafa skilgreint sem öfgasamtök.

Navalní var einnig dæmdur fyrir að vanvirða dómstólinn og gert að greiða sekt.

Hann situr þegar í fangelsi og er að afplána dóm fyrir að rjúfa skilorð dóms sem Mannréttindadómstóll Evrópu hefur sagt gerræðislegan. Saksóknari hafði farið fram á þrettán ára dóm.

Lögmenn Navalnís voru handteknir fyrir utan fangelsið þar sem dómsuppkvaðning fór fram í dag og flutt á brott í lögreglubíl.

Navalní, sem er 45 ára gamall, er þegar í fangelsi vegna tveggja og hálfs árs dóms sem hann hlaut fyrir brot á skilorði vegna dóms frá 2014, sem Mannréttindadómstóll Evrópu hefur sagt gerræðislegan. Hann hefur setið í fangelsi í 428 daga.

Sjá einnig: Naval­ní fundinn sekur um fjár­mála­mis­ferli

Ástæða þess að hann braut skilorðið var þó sú að eitrað hafði verið fyrir honum og hann lá við dauðans dyr á sjúkrahúsi í Þýskalandi. Navalní sakar Vladimír Pútin, forseta Rússlands um að bera ábyrgð á eitruninni en notast var við taugaeitrið Novichok, sem einnig var notað til að eitra fyrir fyrrverandi njósnaranum Sergei Skripal og dóttur hans.

Navalní stofnaði á árum áður samtök gegn spillingu í Rússlandi en þau hafa varpað ljósi á spillingu í ríkisstjórn Pútíns. Í morgun tengdu samtökin, sem heita Sjóður gegn spillingu, eina af dýrustu lúxussnekkjum heims við forsetann.

Samtökin voru í fyrra skilgreind sem öfgasamtök og var þannig komið í veg fyrir að meðlimir þeirra gætu boðið sig fram til þingkosninga, eins og til stóð. Það leiddi einnig til þess að Navalní var ákærður afturvirkt fyrir að svíkja fé úr fólki sem hafði veitt samtökunum fé. Hann var einnig sakaður um að draga sér fé úr sjóðum samtakanna.

Navalní stendur frammi fyrir enn einn ákærunni þar sem hann hefur einnig verið ákærður fyrir öfgastefnu.

Bandamenn Navalnís birtu fyrir skömmu á Twitter röð tísta þar sem hann talar um dóminn. Þar fer Navalní um nokkuð víðan völl. Hann lýsir sér við einn af geimförunum í kvikmyndinni Interstellar og segist fastur í tímahlykkju. Þá heitir hann því að samtök hans séu ekki hætt að fletta ofan af spillingu í Rússlandi.

Navalní kallar einnig eftir stuðningi og aðgerðum gegn ríkisstjórn Pútíns. Hann segir að „þessi halakarta [Pútín] sem situr á olíuleiðslu mun ekki velta sér sjálf úr sessi“.

Moscow Times hefur eftur Kiru Yarmysh, talskonu Navalnís, að hún óttist um líf hans. Ríkisstjórn Rússlands hafi reynt að myrða hann áður og ekkert standi í vegi þeirra til að reyna aftur.

„Við erum ekki bara að tala um frelsi Navalnís, heldur líf hans.“


Tengdar fréttir

Sjá engin ummerki um undiröldu gegn Pútín

Vladimír Pútin, forseti Rússlands, getur enn reitt sig á hollustu hinnar pólitísku elítu í Rússlandi. Það er þrátt fyrir fordæmalausar refsiaðgerðir vegna innrásar Rússa í Úkraínu og að innrásin hafi verið fordæmd um mest allan heim.

Úr leyniþjónustunni í forsetahöllina

Á gamlársdag árið 1999, átta árum eftir fall Sovétríkjanna, tilkynnti þáverandi forseti rússneska sambandsríkisins, Boris Jeltsín, að hann hygðist skyndilega stíga til hliðar. Eftirmaður hans birtist í sjónvarpinu rétt fyrir miðnætti til að ávarpa þjóð sína en hann hafði fæstum verið kunnur þar til fimm mánuðum áður, í ágúst 1999, þegar hann hafði verið skipaður forsætisráðherra af Jeltsín. 

Navalní enn og aftur fyrir dómara

Fangelsisvist Alexeis Navalní, eins helsta stjórnarandstæðings Rússlands, verður mögulega lengd um meira en tíu ár vegna nýrra réttarhalda sem hófust í dag. Hann er meðal annars sakaður um að hafa dregið sér fé úr samtökum sem hann stofnaði á árum áður en voru í fyrra skilgreind sem öfgasamtök af yfirvöldum í Rússlandi.

Navalní fær stöðu hryðjuverkamanns

Fangelsismálayfirvöld í Rússlandi hafa nú skilgreint Alexei Navalní, leiðtoga stjórnarandstöðunnar í landinu, sem öfga- og hryðjuverkamann. Dómstóll úrskurðaði samtök Navalní ólögleg öfgasamtök fyrr á þessu ári.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×