Leita til Ólafs Elías­sonar um hönnun minnis­varða um Heima­eyjar­gosið

Sagt er frá þessu á vef forsætisráðuneytisins, en á næsta ári verða liðin fimmtíu ár frá eldgosinu í Heimaey en gosið stóð frá 23. janúar til 3. júlí 1973. 

„Katrín Jakobsdóttir forsætisráðherra og Íris Róbertsdóttir, bæjarstjóri Vestmannaeyja, undirrituðu í september sl., viljayfirlýsingu um samvinnu og undirbúning viðburða í tilefni tímamótanna og er gerð minnisvarða þar á meðal.

Forsætisráðherra hefur lagt fram þingsályktunartillögu á Alþingi um skipun nefndar vegna undirbúnings kaupa og uppsetningu minnisvarðans. Í nefndinni munu auk fulltrúa forsætisráðherra verða skipaðir tveir fulltrúar Vestmannaeyjabæjar og tveir fulltrúar Alþingis. Auk þess hefur bæjarráð og bæjarstjórn Vestmannaeyja fjallað um viðburði í tengslum við þessi tímamót.

Ólafur Elíasson hefur þegar heimsótt Vestmannaeyjar til að skoða aðstæður en hann hafði það á orði að erlend grein um hraunkælinguna sem bjargaði innsiglingunni hafi vakið áhuga hans á verkefninu.

Auk gerðar minnisvarðans verður tímamótanna minnst með málstofu um eldgosið í Eyjum og gosið í Surtsey. Þá verður sumarfundur norrænu forsætisráðherranna haldinn í Vestmannaeyjum sumarið 2023, en myndarlegur stuðningur barst frá Norðurlöndunum vegna uppbyggingarinnar í kjölfar gossins, bæði í formi fjárframlags og með ýmsum öðrum hætti,“ segir í tilkynningunni.