Kanye herjar á Pete David­son: „Sjáið þennan fá­vita“

Atlaga Kanye að Davidson hefur vakið mikla athygli en hann birti tugi færslna á Instagram á síðustu dögum þar sem hann talaði illa um Davidson og um svik annarra Hollywood-stjarna, sem hafa átt vingott við hann. 

Vakin er athygli á því í fjölmiðlum vestanhafs að Kanye er með geðhvarfasýki, sem hann opnaði sig um árið 2018. Kanye hefur meðal annars gagnrýnt Davidson á undanförnum dögum fyrir grínatriði, sem Davidson flutti í grínþættinum Saturday Night Live árið 2018, þar sem Davidson grínast með geðheilsu Kanye. Í atriðinu segist Davidson sjálfur glíma við geðsjúkdóma, sem hann hefur verið opinn með, en segist taka við því lyf og hvetur Kanye til að gera slíkt hið sama. 

Kanye svaraði gríninu á Instagram í síðustu viku og sagði: „SKETE HEFUR KLÆÐST GERVI-TRUMPHATTI TIL AÐ GAGNRÝNA MIG FYRIR AÐ KJÓSA EKKI RÉTT SEM SVARTUR MAÐUR OG SKOTIÐ Á MIG VEGNA GEÐHEILSU MINNAR.“

Kanye hefur núna eytt öllum sínum færslum af Instagram og eru bara sex færslur eftirstandandi, fimm þeirra birti hann í gær. Í flestum færslunum talar hann um fjölskylduna sína, sem hann ætli að endurheimta, og um að „rústa“ Davidson.

Skilnaðurinn sem fór í klessu eftir SNL

Kanye og Kim tilkynntu fyrir ári síðan að þau væru að skilja og virtist skilnaðurinn á vinalegum nótum, svona fyrst um sinn. Það var ekki fyrr en í október sem málin fóru að flækjast en þann 9. október stjórnaði Kim í fyrsta sinn Saturday Night Live og gerði vel að mati margra. 

Kim bauð Kanye að vera í áhorfendahópnum þegar þátturinn var í loftinu en það var við undirbúning þáttarins sem Kim kynntist Pete Davidson, sem vinnur í þættinum. Í einu atriðinu kysstust þau Pete, sem Kanye líkaði alls ekki. Kanye talaði um kossinn í viðtali við Hollywood Unlocked. 

„Af hverju býðurðu mér í SNL og kyssir gaurinn sem þú ert að hitta beint fyrir framan mig? Og öllum finnst það bara í lagi,“ sagði Kanye í viðtalinu. 

Var ekki boðið í afmæli dótturinnar

Síðan þá hefur Kanye reglulega minnst á Davidson og ósætti hans og Kim í kjölfar skilnaðarins. Kanye keypti sér hús í sömu götu og Kim býr í til að halda nálægð við krakkana þeirra fjóra og hefur lýst því að hann vilji geta gengið inn á heimili Kim óáreittur og eftir sínum óskum. 

Óánægja Kanye varð sérstaklega ljós um miðjan janúar þegar dóttir þeirra Kim, Chicago, átti afmæli. Kim hélt afmælisveislu fyrir hana með systur sinni Kylie Jenner en dóttir hennar Stormi á afmæli á svipuðum tíma. Kanye var ekki boðið í afmælisveisluna og lýsti hann yfir óánægju um að hafa ekki fengið boð í myndskeiði sem hann gaf út. 

Kim sagði í kjölfarið að hún skildi ekkert í ósætti Kanye. Þau hefðu ákveðið að halda sitthvort afmælið fyrir Chicago þennan dag. 

Bjargað frá dauðum til að berja Pete

Kanye gaf þá lag út í janúar ásamt The Game sem heitir Eazy og fer hann þar ekki fögrum orðum um Davidson. Hann minnist í laginu á bílslys sem hann lenti í árið 2002 sem hann kjálkabrotnaði í. Hann segir í texta lagsins að Guð hafi bjargað sér frá dauðanum í þessu slysi til að hann gæti barið Pete Davidson.

Undanfarna daga hefur Kanye farið stórum á samfélagsmiðlum um Davidson, eins og áður segir, og deild fjölda mynda af Davidson á Instagram-reikningi sínum sem hann hefur síðan eytt. 

Ein myndanna sem vakið hefur mikla athygli var mynd, sem tekin var af papparassa, af Davidson og Kim nema myndin klippt þannig að ekki sést í andlitin þeirra. Undir myndina skrifar hann: „SJÁIÐ ÞENNAN FÁVITA, ÉG VELTI FYRIR MÉR HVORT INSTAGRAM LOKI FYRIR AÐGANGINN MINN FYRIR AÐ DISSA FYRRVERANDI KÆRASTA HILLARY CLINTON.“

Vísar hann þar til þess að Davidson fékk sér húðflúr af andliti Clinton á kálfann. 

Þá birti hann mynd af plaggatinu fyrir Marvel myndina Captain America Civil War, en í stað ofurhetjanna var hann búinn að klippa inn andlit sitt, Davidson og annarra Hollywood-stjarna og segja miðlar vestanhafs að með myndbirtingunni hafi hann skipt stjörnunum í lið: Kanye á móti Davidson. 

Með Kanye eru rappararnir Drake, Travis Scott og Future og fyrirsætan og kærasta Kanye Julia Fox. Á hinni hliðinni eru Davidson, Kim, rapparinn Kid Cudi, tónlistarkonurnar Billie Eilish og Taylor Swift, sem Kanye hefur átt í deilum við í fortíðinni. 

Við myndina skrifar hann: „INTERNETIÐ HEFUR ENN EKKI FUNDIÐ GÓÐA MYND AF SKETE,“ sem hann kallar Davidson í nokkrum færslanna. 

Stuttu síðar birti hann mynd með yfirskriftinni „Hver mun sigra?“ þar sem hann setur inn mynd af annars vegar sér og vinum sínum og hins vegar af Davidson og Kid Cudi. 

Kanye birti sömuleiðis mynd sem tekin var í 35 ára afmælisveislu Cudi, fyrir þremur árum síðan, þar sem Cudi var staddur á veitingastað ásamt Davidson, Kanye og leikaranum Timothy Chalamet. Á myndinni sem Kanye deildi var hann hins vegar búinn að krota rauðann kross yfir andlitið á Davidson og skrifaði við myndina: „ÉG VILDI BARA AÐ VINUR MINN STÆÐI VIÐ BAKIÐ Á MÉR EN HNÍFURINN FER BARA DÝPRA.“

Svo virðist sem einhverjir hafi haldið að brotist hafi verið inn á Instagram-aðgang Kanye en hann birti í gær mynd af sér, haldandi á blaði sem á stendur að ekki hafi verið brotist inn á aðganginn. Við myndina skrifar hann: „ÞAÐ VAR EKKI BROTIST INN Á AÐGANGINN MINN ÉG VERÐ Í SUNNUDAGSMESSU Á HÁDEGI OG FER SVO MEÐ NORTH OG SAINT Á OFURSKÁLINA STUTTU SEINNA.“

Í gær virðist sem Kanye hafi eytt út öllum fyrri færslum en á Instagram-síðu hans er nú bara hægt að finna fimm færslur frá því í gær og eina síðan á fimmtudag, sú er með nokkrum myndum af Kim og börnunum þeirra fjórum og skrifar Kanye við færsluna: „GUÐ GERÐU ÞAÐ SAMEINAÐU FJÖLSKYLDU OKKAR Á NÝ.“

Við hinar færslunar skrifar hann svipaða hluti, að hann vilji sameina fjölskyldu sína að nýju og varar fólk við hinum „grunsamlega Skete Davidson.“ Tvær færlsurnar eru myndbrot úr Ofurskálarauglýsingu McDonalds, sem Kanye er sjálfur í, og við aðra færsluna skrifar Kanye: „ÆTLA AÐ FÁ MÉR BIG MAC FRÁ MCDONALDS OG RÚSTA PETIE DAVIDSUN.“