Vísbending um að lík sé fundið í Þingvallavatni

Fram kemur í tilkynningu frá lögreglu að á sónarmyndinni sjáist myndform sem mögulega geti verið útlínur mannslíkama og þykir því nauðsynlegt að kanna málið nánar. Vegna þessa má búast við auknum aðgerðum á vatninu um tíma.

„Aðstandendur hafa verið upplýstir um stöðu mála og að atvik sem þessi muni koma upp á næstu dögum ef sónarmyndir gefa tilefni til þess að eitthvað sé skoðað nánar.“

Greint var frá því fyrr í dag að flak flug­vélarinnar TF-ABB, sem fannst á botni Þing­valla­vatns á föstudag, væri mjög heil­legt. Skoðun kafara í gær leiddi í ljós að enginn þeirra fjögurra farþega sem voru um borð í vélinni er inni í flakinu. 

Í kapphlaupi við tímann

Allt bendir til að flug­vélin hafi hafnað á Þing­valla­vatni áður en hún sökk og þeir fjórir sem voru um borð hafi komist út úr henni af sjálf­sdáðum eftir að hún endaði á vatninu.

Leit hófst að flug­manninum og þremur er­lendum ferða­mönnum, sem voru far­þegar hans, í birtingu í morgun. Fjöl­mennt lið lög­reglu- og björgunar­sveitar­fólks á­samt sér­að­gerða­sveit Land­helgis­gæslunnar tekur þátt í leitinni.

Leitar­fólk er í kapp­hlaupi við tímann þar sem ofsa­veðri er spáð á svæðinu og um land allt í nótt. Leitað er að fólkinu við vatnið, á því og á botni þess með kaf­báti.