Innlent

Segir frá­sögn þing­manns um starf­semi SÁÁ byggja á úr­eltum hug­myndum

Fanndís Birna Logadóttir skrifar
Ingunn Hansdóttir, yfirsálfræðingur SÁÁ, segir Jódísi Skúladóttur hafa farið með rangt mál. 
Ingunn Hansdóttir, yfirsálfræðingur SÁÁ, segir Jódísi Skúladóttur hafa farið með rangt mál.  Mynd/SÁÁ

Ingunn Hansdóttir, yfirsálfræðingur SÁÁ, hafnar alfarið fullyrðingum þingmanns Vinstri grænna um að ófagleg vinnubrögð hafi fengið að viðgangast innan samtakanna. Hún segir allt meðferðarstarf byggja á gagnreyndum aðferðum og segir miklar breytingar hafa orðið á síðustu árum.

Jódís Skúladóttir steig í gær fram sem fyrrum skjólstæðingur SÁÁ og greindi frá því að starfsmaður samtakanna hafi misnotað hana þegar hún var sautján ára, þremur árum áður en hann tók síðan á móti henni við komuna í meðferð. Umræddur maður starfi enn á vegum samtakanna.

Ingunn Hansdóttir, yfirsálfræðingur SÁÁ, ræddi málið í viðtali við umsjónarmenn Reykjavík Síðdegis á Bylgjunni í dag en hún sagði leitt að heyra af reynslu Jódísar og að margt sem hún hafi sagt væri umhugsunarvert. Sú mynd sem Jódís hafi dregið upp af meðferðarstarfi SÁÁ hafi þó ekki verið rétt.

„Margt af því sem hún sagði var bara rangt og byggði á úreltum hugmyndum um hvað við gerum í dag í meðferð SÁÁ. Hún var að jöfnum höndum að tala um samtökin en síðan eru við líka með meðferðarstarf sem er sem sagt heilbrigðisþjónusta SÁÁ,“ sagði Ingunn.

Að sögn Ingunnar fór Jódís með rangt mál varðandi nokkra þætti auk þess sem hún gagnrýndi starfsfólk. Ingunn bendir á að áfengis- og vímuefnaráðgjafar séu lögverndað starfsheiti og að mikil fræðsla fari fram áður en starfsleyfi er gefið út.

„Þetta er þriggja ára nám þar sem eru ekki bara nokkrar vikur í fræðslu eins og hún hélt fram, heldur 300 klukkustundir í fræðslu, það eru staðfest próf, mikil handleiðsla og sex þúsund klukkustundir í þjálfun,“ sagði Ingunn.

„Það er mun meiri handleiðsla og starfsþjálfun heldur en margar aðrar umönnunarstéttir og heilbrigðisstéttir frá. Þannig þetta er alrangt, það starfar engin hjá okkur án þess að hann hafi þessi réttindi staðfest af embætti landlæknis,“ sagði Ingunn.

Hún segir mögulegt að önnur staða hafi verið uppi á teningnum þegar Jódís leitaði til samtakanna en núverandi fyrirkomulag hefur verið í gildi frá árinu 2006.

„Þetta eru gamlar og úreltar hugmyndar sem kannski voru við lýði þegar að hún kom til meðferðar fyrir síðustu aldarmót. Hlutirnir hafa þróast, þannig áður en maður fer af stað að tala um svona hvernig starf er inni í heilli stofnun þá þarf kannski að kynna sér málin,“ segir Ingunn.

Hún bendir á að allt meðferðarstarf byggi á gagnreyndum aðferðum og eru þau með áfallamiðaða nálgun.

„Hún er svolítið að líkja þessu við, og setja í sama pott, eins og við værum trúarsamtök jafnvel. Þannig það þarf líka bara að koma fram að við erum að byggja þetta á faglegum grunni. Það var ekki alltaf þannig og þetta bara þróast með tímanum. Það eru miklar breytingar og þróun í þekkingu í meðferðarstarfi og við erum bara stödd þar,“ sagði Ingunn.

Viðtalið við Ingunni í heild sinni má finna hér fyrir neðan: 


Tengdar fréttir

Fordæma hegðun Einars og boða formannskjör

Framkvæmdastjórn SÁÁ fordæmir Einar Hermannsonar vegna vændiskaupa hans sem greint hefur verið frá í fjölmiðlum. Nýtt formannskjör fer fram á föstudaginn.

Afsögn formanns SÁÁ: Svaraði auglýsingu um kynlíf gegn greiðslu

Einar Hermannsson hefur sagt af sér sem formaður SÁÁ. Þetta kemur fram í yfirlýsingu frá honum til fjölmiðla. Hann segir ástæðuna þá að hann hafi svarað auglýsingu á netinu fyrir einhverjum árum þar sem í boði hafi verið kynlíf gegn greiðslu. Það mál hafi ratað aftur upp á yfirborðið.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×