Handbolti

Strákarnir sem þurfa að fylla í stóru skörðin

Ingvi Þór Sæmundsson skrifar
Strákarnir sem koma inn í íslenska liðið fá stórt tækifæri í næstu fjórum leikjum.
Strákarnir sem koma inn í íslenska liðið fá stórt tækifæri í næstu fjórum leikjum.

Líf, ertu að grínast? Einmitt þegar íslenska karlalandsliðið í handbolta var á uppleið og með gríðarlega mikinn meðbyr duttu fimm leikmenn út vegna veiruskrattans. En hverjir koma til með að fylla í skörð fimmmenninganna.

Í gærkvöldi var greint frá því að Björgvin Páll Gústavsson, Elvar Örn Jónsson og Ólafur Guðmundsson hefðu greinst með kórónuveiruna. Vont varð verra þegar þeir Aron Pálmarsson og Bjarki Már Elísson bættust á sjúkralistann í dag. Og framundan eru leikir gegn heimsmeisturum Dana, Ólympíumeisturum Frakka, Króötum og Svartfellingum í milliriðli Evrópumótsins. 

Maður kemur í manns stað og allt það en þetta eru engin smá skörð sem eru höggvin í íslenska liðið. En hverjir munu fylla þau?

Óhætt er að segja að Orri Freyr Þorkelsson, 22 ára leikmaður Elverum í Noregi, fái sannkallaða eldskírn í kvöld. Hann er eini vinstri hornamaðurinn í íslenska hópnum og þarf að fylla skarð Bjarka. Orri spilaði ekki mínútu í riðlakeppninni og hefur aðeins komið inn á í einum landsleik, gegn Litáen í undankeppni EM haustið 2020. Þar skoraði hann eitt mark.

Orri hefði líklega ekki verið í EM-hópnum en fór með vegna meiðsla Hákons Daða Styrmissonar. Og nú fær hann risastórt tækifæri til að stimpla sig inn í landsliðið.

Orri Freyr Þorkelsson skorar eitt eina mark fyrir íslenska landsliðið.vísir/vilhelm

Orri er á sínu fyrsta ári í atvinnumennsku en hann gekk í raðir Elverum frá Haukum síðasta sumar. Honum hefur vegnað vel með Elverum og er markahæsti leikmaður liðsins í norsku úrvalsdeildinni. Orri hefur hins vegar lítið spilað með Elverum í Meistaradeildinni.

Fámennt vinstra megin

Eftir að Aron, Ólafur og Elvar heltust úr lestinni er íslenska liðið orðið ansi fámennt vinstra megin fyrir utan. Elvar Ásgeirsson, leikmaður Nancy, getur spilað bæði sem leikstjórnandi og skytta og mun væntanlega fá stórt tækifæri í kvöld í sínum fyrsta landsleik. Ekki bara fyrsta leiknum á stórmóti, heldur fyrsta A-landsleiknum!

Elvar Ásgeirsson hefur glímt við erfið meiðsli á ferlinum en hefur verið á góðri siglingu að undanförnu.vísir/bára

Elvar, sem er 27 ára, gekk í raðir Stuttgart frá Aftureldingu í febrúar 2019. Mosfellingurinn fékk hins vegar fá tækifæri hjá þýska liðinu og færði sig um set til Nancy í Frakklandi í fyrra. Elvar hefur leikið vel í vetur og er með 47 mörk, fjórtán stoðsendingar og 53 prósent skotnýtingu í tólf leikjum í frönsku úrvalsdeildinni.

Daníel Þór Ingason, sem kemur einnig inn í hópinn eftir að hafa setið uppi í stúku í riðlakeppninni, er öllu reyndari þegar kemur að landsliðinu. Hann hefur leikið 34 landsleiki, þar af átta á HM 2019.

Daníel Þór Ingason í leik gegn Barein á HM 2019.getty/TF-Images

Þessi 26 ára leikmaður Balingen-Weilstetten í Þýskalandi var öflugur sóknarmaður þegar hann lék með Haukum en eftir að hann fór í atvinnumennsku hefur hann aðallega einbeitt sér að varnarleiknum. Og Daníel mun sennilega fyrst og síðast hjálpa íslenska liðinu á varnarhelmingnum en það er aldrei að vita nema hann fái tækifæri til að rifja upp gamla sóknartakta.

Íslenska liðið er vel búið af örvhentum skyttum og er með fjórar þannig í hópnum. Ómar Ingi Magnússon getur einnig spilað á miðjunni og gerði það mikið með yngri landsliðunum. Guðmundur Guðmundsson gæti því brugðið á það ráð að nota Ómar á miðjunni og Gísli Þorgeir Kristjánsson og Janus Daði Smárason gætu því leyst af vinstra megin fyrir utan.

Springur Viktor Gísli út?

Ágúst Elí Björgvinsson kemur einnig inn í hópinn og mun verja mark Íslands ásamt Viktori Gísla Hallgrímssyni. Ágúst býr yfir talsverðri landsliðsreynslu og er á sínu fjórða stórmóti. Hann hefur jafnan verið í hlutverki varamarkvarðar en oft átt góðar innkomur, eins og gegn Portúgal á síðasta heimsmeistaramóti.

Miklar vonir eru bundnar við Viktor Gísla Hallgrímsson sem þykir einn efnilegasti markvörður heims.vísir/vilhelm

Viktor Gísli fær stórt tækifæri í næstu leikjum gegn sterkum andstæðingum. Þessi bráðefnilegi markvörður er á sínu þriðja stórmóti og springur vonandi endanlega út í milliriðlinum og sýnir af hverju það hefur verið látið svona mikið með hann síðan hann stökk barnungur fram á sjónarsviðið. Hæfileikarnir eru allavega til staðar.

Tuttugu leikmenn fóru með til Búdapest en fimm eru smitaðir. Það verða því aðeins fimmtán íslenskir leikmenn á skýrslu gegn Dönum í kvöld. Fleiri leikmenn eru þó væntanlega á leið til Ungverjalands til að íslenska liðið verði fullmannað í næstu leikjum.

Fyrr í þessum mánuði gaf EHF það út að kalla mætti á leikmenn utan 35 manna hópsins sem var tilkynntur fyrir mótið. Guðmundur mun því væntanlega þurfa að nýta sér það úrræði.


Tengdar fréttir

Íslensku dómararnir úr leik á EM vegna smits

Kórónuveiran hefur ekki aðeins hrellt íslenska landsliðsmenn á Evrópumótinu í handbolta, því íslenska dómaraparið á mótinu hefur einnig stimplað sig út vegna smits.

Aron og Bjarki líka með Covid

Strákarnir okkar fengu annan skell í morgun þegar í ljós kom að Aron Pálmarsson og Bjarki Már Elísson séu með Covid. Fimm leikmenn liðsins eru því orðnir smitaðir.

Þrír smitaðir í íslenska liðinu

Það berast ekki góð tíðindi úr herbúðum strákanna okkar kvöldið fyrir fyrsta leik í milliriðli. Þrír leikmenn liðsins eru komnir með Covid.




Fleiri fréttir

Sjá meira


×