Innlent

Tímaspursmál hvenær starfsemi fyrirtækja lamast

Sunna Valgerðardóttir skrifar
Andri Þór Guðmundsson, forstjóri Ölgerðarinnar, segir að miðað við umfang smita undanfarna daga þá hljóti fyrirtækið að verða fyrir hnjaski á næstu vikum. 
Andri Þór Guðmundsson, forstjóri Ölgerðarinnar, segir að miðað við umfang smita undanfarna daga þá hljóti fyrirtækið að verða fyrir hnjaski á næstu vikum.  Vísir/Egill

Forstjórar tveggja stórra fyrirtækja í Reykjavík segjast þakka fyrir hvern dag þar sem starfsemin helst gangandi, en það sé bara tímaspursmál hvenær það taki enda. Nærri fimm prósent allra íbúa höfuðborgarsvæðisins eru nú annað hvort í sóttkví eða einangrun.

Forsvarsmenn atvinnulífsins hafa margir hverjir verið mjög iðnir við að gagnrýna sóttvarnaaðgerðirnar í faraldrinum og segja þær hafa haft verulega slæm áhrif á vinnu fólks í landinu. Framkvæmdastjóri Félags atvinnurekenda telur að aðgerðirnar séu svo íþyngjandi að stjórnvöld verði að treysta fyrirtækjum til þess að halda starfseminni gangandi.

Kvíðir framhaldinu

„Blessunarlega höfum við sloppið sæmilega vel hingað til. Við höfum misst eina og eina vakt af og til, lentum í fimm manns í einu, það var svona mesta tjónið okkar,” segir Andri Þór Guðmundsson, forstjóri Ölgerðarinnar. „Vissulega höfum við oft gengið lengra heldur en þarf til að vernda starfsemina en ég er hræddur um að miðað við umfangið sem er núna þá siglum við smám saman í strand, því miður. Ég er mjög kvíðinn því að starfsemin stöðvist.”  

Andri segir það einungis tímaspursmál þar til smitin hafi lamandi áhrif á starfsemina, þrátt fyrir öll tiltæk ráð í sóttvörnum.  

Tæp 5 prósent allra íbúa lokuð inni

Þetta eru ekki óþarfa áhyggjur hjá Andra. Af þeim tæplega 15 þúsund sem eru annað hvort í sóttkví eða einangrun er langstærstur hluti á höfuðborgarsvæðinu, um 10.500 manns, eða 4,5 prósent af íbúafjölda svæðisins. Næst hæsta hlutfallið er á Suðurnesjum, fjögur prósent, svo á Suðurlandi. Hlutfallslega eru fæstir innilokaðir á Vestfjörðum og Norðurlandi vestra.

Þó að mörg fyrirtæki geti verndað starfsemi sína með heimavinnu starfsfólks, þá eru það sannarlega ekki öll.

„Við erum auðvitað með rekstur og aðstæður, þar sem maður er nánast í úrslitaleik á hverjum degi. Auðvitað tekur það á taugarnar og auðvitað tekur það á,” segir Magnús Óli Ólafsson, forstjóri Innnes. Þar eru starfsmenn hraðprófaðir á hverjum degi. „Við höfum hingað til bara fengið einstök tilvik þar sem einstaklingar þurfa að fara í sóttkví eða hafa smitast, en heilt yfir hefur þetta gengið vel. Og núna þegar staðan er eitthvað eilítið öðruvísi þá finnst mér langt gengið að ætla að gerast einhver sérfræðingur í þeim efnum.”


Tengdar fréttir

Stefnir í að einangrun styttist í sjö daga

Þórólfur Guðnason sóttvarnalæknir reiknar með að það skýrist í dag hvort einangrun einkennalítilla og -lausra með Covid-19 verði stytt í sjö daga. Þá munu í dag koma út reglur um vinnusóttkví sem fyrirtæki af öllum stærðum eiga að geta lagað sig að.

Ás­laug vill endur­skoða ein­angrun barna

Áslaug Arna Sigurbjörnsdóttir, vísinda- iðnaðar og nýsköpunarráðherra, velti því upp á Twitter-síðu sinni fyrr í dag hvort tilefni væri til að stytta einangrun og sóttkví barna. Eins og stendur er lengd einangrunar þeirra sem smitast af kórónuveirunni almennt tíu dagar.

Skoða hvort fleirum verði leyft að vinna í sótt­kví

Mikill fjöldi landsmanna er nú í einangrun og sóttkví sem hefur eðli málsins samkvæmt áhrif á vinnustaði víðsvegar um landið. Viðræður hafa staðið yfir, meðal annars við Samtök atvinnulífsins, um hvort koma megi á sérstakri vinnusóttkví.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.