Viðskipti innlent

Áhöfn olíuskips á útopnu að þjóna loðnubræðslum

Kristján Már Unnarsson skrifar
Hörður Gunnarsson, framkvæmdastjóri Olíudreifingar ehf.
Hörður Gunnarsson, framkvæmdastjóri Olíudreifingar ehf. Sigurjón Ólason

Viðbótar olíuflutningar til loðnuverksmiðja til að mæta óvæntri raforkuskerðingu jafngilda farmi 550 olíubíla af stærstu gerð. Umferð olíutrukka á þjóðvegunum mun þó ekki aukast því eina olíuskip Íslendinga fer í verkefnið.

Fjallað var um málið í fréttum Stöðvar 2 en eigendur ellefu fiskimjölsverksmiðja fengu óvænt þær fréttir frá Landsvirkjun fyrir tólf dögum, í upphafi loðnuvertíðar, að engin afgangsorka væri til í kerfinu. Þeir þyrftu að keyra rafvæddar loðnubræðslurnar á olíu.

Við spurðum Hörð Gunnarsson, framkvæmdastjóri Olíudreifingar ehf., hvað þetta væri stórt dæmi sem fyrirtækið hefði núna allt í einu fengið upp í hendurnar:

„Þetta er náttúrlega viðbót við það sem verið hefur undanfarin ár vegna þess að þetta er extra stór vertíð. Og við gerum ráð fyrir því að þá verði þetta auka 20 milljónir lítra, sem við þurfum að koma til verksmiðja í landinu,“ svarar Hörður og miðar við þá forsendu að engin raforka fáist í bræðslurnar.

Olíubílar lestaðir í olíustöðinni í Örfirisey.Sigurjón Ólason

Til að átta sig betur á magninu má geta þess að þetta er álíka og rúmast í 550 olíuflutningabílum af lengri gerðinni, að sögn Harðar. Olían verður þó ekki flutt á trukkum um þjóðvegina.

„Nei, við flytjum þetta allt saman með Keili. Við erum að þjónusta sjö verksmiðjur í landinu. Allt eldsneyti sem þær nota, fyrir utan rafmagn, verður flutt með Keili. Við þurfum svona 26 aukaferðir með Keili.“

Þetta þýðir þrjá til fjóra skipsfarma að jafnaði á hverja verksmiðju. Nokkrar þeirra munu þó fá olíu með skipum beint frá útlöndum. En svo mikið er víst; það er hafin törn hjá skipverjunum á Keili.

Olíuskipið Keilir á leið að olíubryggjunni í Örfirisey síðastliðinn fimmtudag.Sigurjón Ólason

„Já, já. Það er bara unnið alla daga allan sólarhringinn á Keili núna framundan næstu mánuði. Það er bara skiptiáhöfn á honum.“

-Þannig að hann verður alveg á útopnu?

„Hann verður alveg á útopnu, alla daga. Þetta er nú eina olíuflutningaskipið sem Íslendingar eiga. Þannig að við leggjum mikið traust á það.“

-En fyrir ykkur í olíubransanum, eruð þið ekki bara að gleðjast yfir þessum auknu verkefnum?

„Jú, gera það ekki allir sem fá aukin verkefni? Þeir gleðjast. Við tökum bara þátt í gleðinni með fiskimjölsframleiðendum,“ svarar forstjóri Olíudreifingar.

Hér má sjá frétt Stöðvar 2:


Tengdar fréttir

Orkustjórar í ritdeilu um raforkuskort

Stjórnendur tveggja stærstu orkufyrirtækja landsins, Landsvirkjunar og Orkuveitu Reykjavíkur, eru komnir í opinbera ritdeilu á Vísi um raforkuskort í landinu. Þetta eru þeir Bjarni Bjarnason, forstjóri OR, og Gunnar Guðni Tómasson, framkvæmdastjóri vatnsafls hjá Landsvirkjun. Bæði fyrirtækin eru alfarið í opinberri eigu; Landsvirkjun í eigu ríkisins en Orkuveitan að mestu í eigu Reykjavíkurborgar.

Skerða orku til fiski­mjöls­verk­smiðja, ál­vera og gagna­vera

Landsvirkjun hefur ákveðið að skerðing á afhendingu raforku til fiskimjölsverksmiðja taki strax gildi, en ekki í janúar eins og ætlað hafði verið. Skerðingin nær einnig til stórnotenda á borð við gagnaver og álver sem eru með skerðanlega skammtímasamninga.





Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.