Hyggjast bólusetja alla óbólusetta við komuna til Gana

Aðeins um 5,7 prósent íbúa Gana eru bólusettir en um 30 milljónir búa í landinu. Nýtilkynntar aðgerðir eru meðal þeirra ströngustu í Afríku en lágt bólusetningarhlutfall má hins vegar helst rekja til skort á bóluefnum og vandkvæða við framkvæmd bólusetning.

Patrick Kuma-Aboagye, æðsti yfirmaður heilbrigðisþjónustunnar í landinu, sagði í yfirlýsingu í gær að vegna fjölda nýrra tilfella og greiningar ómíkron-afbrigðisins meðal ferðalanga sem kæmu til landsins erlendis frá, væri nauðsynlegt að grípa strax til aðgerða.

Bólusetningarátak stendur yfir í Gana nú í desember en frá og með 22. janúar tekur gildi bólusetningarskylda meðal ákveðinna hópa, svo sem opinberra starfsmanna, heilbrigðisstarfsmanna og námsmanna.

Þá mun engin komast inn á staði þar sem fólk safnast saman nema framvísa bólusetningarpassa.

Á síðustu vikum greindust 60 prósent smita í Gana á Kotoka-alþjóðaflugvellinum í höfuðborginni Accra. Þeir sem greindust á vellinum voru þrisvar sinnum líklegri til að vera óbólusettir. 

34 tilvik ómíkron greindust í landinu, þar af 75 prósent meðal óbólusettra.

131.246 hafa greinst með Covid-19 í Gana frá upphafi kórónuveirufaraldursins og 1.228 látist.

Guardian greindi frá.