Innlent

Ný brú yfir Fossvog tilbúin eftir um tvö ár

Heimir Már Pétursson skrifar
Vinningstillagan Alda kom frá teymi á vegum EFLA hf.
Vinningstillagan Alda kom frá teymi á vegum EFLA hf. vegagerðin

Borgarstjóra og bæjarstjóra Kópavogs líst vel á vinningstillögu að brú milli Reykjavíkurflugvallar og Kársness sem kynnt var í dag. Brúin verður eitt fyrsta mannvirkið sem tengist Borgarlínu.

Í upphafi kepptu fimmtán aðilar um hönnun brúarinnar en að lokum voru þrjár tillögur valdar til að skoða betur. Í dag var niðurstaða dómnefndar síðan kynnt í Háskólanum í Reykjavík og upplýst að hópur á vegum Eflu verkfræðistofu átti vinningstillöguna.

Þessi tillaga kallaðist Hvalbak og var frá KI Rådgivende Ingeniører og Gottlieb Paludan Architects í samstarfi við ES-Consult og Gísla Sæmundsson arkitekt hjá Arkteikn.vegagerðin

Eftir tvö til þrjú ár verður risin 270 metra brú frá Kársnesi yfir að Reykjavíkurflugvelli fyrir gangandi, hjólandi og Borgarlínu. Brúin mun stytta mjög ferðatímann á milli Kársnesins og miðborgar Reykjavíkur.

Tillagan Sjónarrönd kom frá Basalt Arkitektum.vegagerðin

Ármann Kr. Ólafsson bæjarstjóri í Kópavogi og Dagur B. Eggertsson borgarstjóri voru hæstánægðir með vinningstillöguna. Þeir telja að brúin eigi eftir að breyta miklu fyrir íbúa á höfuðborgarsvæðinu.

Ármann Kr Ólafsson bæjarstjóri í Kópavogi og Dagur B. Eggertsson borgarstjóri í Reykjavík eru hæstánægðir með væntanlega brú yfir Fossvog og telja hana eiga eftir að breyta miklu fyrir íbúa höfuðborgarsvæðisins.Stöð 2/Sigurjón

„Ég á auðvitað eftir að skoða útfærsluna nánar. En það að fá þessa tengingu er miklu meiri breyting en ég held við áttum okkur á. Kársnesið færist náttúrlega algerlega inn í Nauthólsvík nánast og öfugt,“ segir Dagur.

Ármann segir brúna stytta leið um 90 þúsund manns í stóru sveitarfélögunum sunnan Reykjavíkur til og frá vinnu. Háskólarnir, Landspítalinn og stjórnsýslan séu fjölmennustu vinnustaðir landsins. Þá styttist ferðatíminn frá Hamraborg í Háskólann í Reykjavík úr um sautján mínútum í sex.

„Sem nýtist nákvæmlega öllum þessum níutíu þúsundum, ekki bara Kópavogsbúum heldur Garðbæingum og Hafnfirðingum líka. Þannig að ég er mjög bjartsýnn á þetta. Þessi tenging og þessi hringur sem verður til hérna í krinigum Fossvoginn með þessu á eftir að auka mjög mikið útivist á svæðinu vil ég meina,“ segir Ármann og borgarstjóri tekur heilshugar undir það.

Bryndís Friðriksdóttir svæðisstjóri höfuðborgarsvæðisins hjá Vegagerðinni segir að brúin Alda verði tilbúin árið 2024.Stöð 2/Sigurjón

Bryndís Friðriksdóttir svæðisstjóri höfuðborgarsvæðisins hjá Vegagerðinni segir að innan fárra ára verði síðan byggt yfir Borgarlínuna þar sem hún fer í gegnum háskólaþorpið undir Öskjuhlíð. Nú taki hins vegar við um eins árs hönnunarferli hjá Vegagerðinni vegna brúarinnar.

„Eftir það hefjast framkvæmdir. Þannig að í lok árs 2023, byrjun árs 24 getur fólk farið að njóta þess að fara yfir brúna,“ segir Bryndís.


Tengdar fréttir

Efla vann hönnunar­sam­keppni um nýja brú yfir Foss­vog

EFLA, í samstarfi við BEAM Architects, vann sigur í hönnunarsamkeppni um nýja brú yfir Fossvog. Útlit sigurtillögunnar var kynnt á fundi Vegagerðarinnar, Reykjavíkurborgar og Kópavogsbæjar í Háskólanum í Reykjavík fyrr í dag.

Stórt skref í átt að brú yfir Fossvog

Bæjarstjórn Kópavogs staðfesti á fundi sínum á þriðjudag afgreiðslu skipulagsráðs þess efnis að tillaga að deiliskipulagi brúar yfir Fossvog verði auglýst.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×