Körfubolti

Sneri aftur með látum úr sínu fyrsta banni

Sindri Sverrisson skrifar
LeBron James og Malcolm Brogdon lögðu sig alla fram í nótt.
LeBron James og Malcolm Brogdon lögðu sig alla fram í nótt. AP/Darron Cummings

LeBron James skoraði 39 stig þegar hann sneri aftur til leiks með LA Lakers í nótt, eftir sitt fyrsta leikbann á ferlinum. Liðið fagnaði 124-116 sigri á Indiana Pacers í framlengdum leik í NBA-deildinni í körfubolta.

Lakers voru án Anthony Davis sem spilað hafði veikur í tapinu gegn New York Knicks kvöldið áður. Það kom á endanum ekki að sök þó að Lakers hafi ekki spilað vel í nótt.

Staðan í lok venjulegs leiktíma var 112-112, eftir að Chris Duarte jafnaði metin með þriggja stiga skoti þegar 6,5 sekúndur voru eftir. Lokatilraun James geigaði og því varð að framlengja en þar stóð vörn Lakers vaktina vel og liðið vann að lokum átta stiga sigur, þar sem þristar James gerðu út um leikinn.

Russell Westbrook skoraði 20 stig fyrir Lakers og Malik Monk skoraði 17 og tók 8 fráköst. Malcolm Brogdon var stigahæstur Indiana með 28 stig.

Lakers hafa þar með unnið 10 af 20 leikjum sínum hingað til og eru í 9. sæti vesturdeildarinnar. Indiana er með 8 sigra og 12 töp.

Bræðrabylta en sá eldri fagnaði

Golden State Warriors hafa byrjað leiktíðina allra liða best og eru með 16 sigra í 18 leikjum, á toppi vesturdeildarinnar. Liðið vann fimmta leik sinn í röð í nótt þegar það hafði betur gegn Philadelphia 76ers, 116-96.

Gestirnir frá Philadelphia voru enn án Joel Embiid en búist er við því að stóri maðurinn geti snúið aftur á laugardag, eftir að hafa verið þrjár vikur frá keppni vegna kórónuveirusmits.

Stephen Curry skoraði 25 stig fyrir Golden State og átti 10 stoðsendingar, gegn litla bróður sínum Seth Curry sem var stigahæstur hjá Philadelphia með 24 stig. Mágur bræðranna, Damion Lee, skoraði 5 stig fyrir Golden State.

  • Úrslitin í nótt:
  • Cleveland 115-120 Phoenix
  • Indiana 116-124 LA Lakers
  • Orlando 99-106 Charlotte
  • Boston 104-123 Brooklyn
  • Houston 118-113 Chicago
  • Memphis 113-126 Toronto
  • Milwaukee 114-93 Detroit
  • Minnesota 113-101 Miami
  • New Orleans 127-102 Washington
  • Oklahoma 104-110 Utah
  • San Antonio 106-124
  • Golden State 116-96
  • Sacramento 125-121 Portland
NBA



Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.