Íslenski boltinn

„Ætli móðirin hafi ekki séð um uppeldið“

Sindri Sverrisson skrifar
Viðar Halldórsson þakkaði Sigurði Óla Þorleifssyni fyrir leikinn með því að taka lengi og fast í höndina á honum.
Viðar Halldórsson þakkaði Sigurði Óla Þorleifssyni fyrir leikinn með því að taka lengi og fast í höndina á honum. Skjámynd/S2 Sport

Sigurður Óli Þórleifsson, aðstoðardómari í leiknum fræga á milli FH og Stjörnunnar árið 2014, sendir fyrrverandi formanni knattspyrnudeildar FH tóninn í færslu á Facebook eftir harkaleg ummæli formannsins í hans garð.

Jón Rúnar Halldórsson, fyrrverandi formaður knattspyrnudeildar FH til margra ára, var viðmælandi Henrys Birgis Gunnarssonar í fyrsta þætti af Foringjunum á Stöð 2 Sport á sunnudagskvöld.

Í þættinum barst talið að 2-1 sigri Stjörnunnar gegn FH í Kaplakrika, í lokaumferð úrvalsdeildar karla í fótbolta árið 2014. Taldi Jón Rúnar það á ábyrgð dómaranna í leiknum að FH hefði þurft að horfa á eftir Íslandsmeistaratitlinum til Stjörnunnar, og sagði hann Stjörnuna raunar eiga eftir að vinna Íslandsmeistaratitil.

Jón Rúnar gekk svo langt að kalla Sigurð Óla, sem gerði mistök þegar hann dæmdi ekki rangstöðu í fyrra marki Stjörnunnar, „blindan beitusala“.

„Mikið er nú gaman hvað þetta fer enn illa í hann, ég geri ráð fyrir því að Atli Viðar og fleiri leikmenn FH sem að brenndu af hverju dauðafærinu á fætur öðrum séu ekki heldur heiðursborgarar, en ég á ekki mikið af beitu til núna, en nóg af beitningarvélum,“ skrifar Sigurður Óli í opinni færslu á Facebook. Hann starfar hjá Mustad Autoline í Grindavík.

Jón Rúnar er faðir söngvaranna Jóns og Friðriks Dórs, og þeirra Hönnu Borgar og Maríu Mjallar, sem virðast að mati Sigurðar Óla vera föðurbetrungar:

„Eins og hann á nú fín og flott börn þessi maður, en ætli móðirin hafi ekki séð um uppeldið,“ skrifar Sigurður Óli.

Foringjarnir eru á dagskrá Stöðvar 2 Sports á sunnudagskvöldum en þar ræðir Henry Birgir Gunnarsson við nokkra af helstu íþróttaforingjum landsins síðustu áratugi. Þættirnir eru einnig aðgengilegir á Stöð 2+.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.