Innlent

Isavia sýknað af bóta­kröfu vegna út­boðs á verslunar­rými

Vésteinn Örn Pétursson skrifar
Frá Keflavíkurflugvelli.
Frá Keflavíkurflugvelli. Vísir/Vilhelm

Héraðsdómur Reykjavíkur sýknaði í síðasta mánuði Isavia af bótakröfu fyrirtækisins Drífu ehf., sem fer með rekstur Icewear. Drífa krafðist bóta úr hendi Isavia vegna þess að fyrirtækinu var ekki úthlutað verslunarrými á Keflavíkurflugvelli í kjölfar útboðs árið 2014.

Dómurinn féll þann 13. október en var birtur á vef héraðsdómstólanna í dag. RÚV greindi fyrst frá dóminum.

Eftir að hafa ekki fengið úthlutað verslunarrými kærði Drífa ehf. útboðið til kærunefndar útboðsmála en nefndin vísaði málinu frá. Fyrirtækið hafi í kjölfarið höfðað mál og farið fram á skaðabætur úr hendi Isavia.

Isavia var sýknað af kröfum Drífu í héraði fyrir þremur árum síðar, en Landsréttur felldi dóminn úr gildi og vísaði málinu aftur til héraðsdóms þar sem sérfróður meðdómsmaður hafi ekki verið skipaður við meðferð málsins.

Í dóminum sem féll í síðasta mánuði var ekki fallist á að Isavia, eða nefndarmenn Isavia í forvalinu, hafi sýnt af sér saknæma og ólögmæta háttsemi við meðhöndlun á tilboði Drífu ehf. í útboðinu. Þvert á móti var talið að umgjörð forvalsins hafi verið vönduð, jafnræðis og gagnsæis hafi verið gætt í hvívetna og að lögmæt og málefnaleg sjónarmið hafi ráðið för við afgreiðslu tilboðsins.

Isavia var því sýknað af dómkröfum Drífu og málskostnaður felldur niður.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.