Innlent

Samfylking og Sjálfstæðisflokkur fengju nýja þingmenn á kostnað Framsóknar og Pírata

Heimir Már Pétursson skrifar
Undirbúningskjörbréfanefnd stefnir að því að ljúka skoðun sinni á meðferð kjörgagna í Norðvesturkjördæmi fyrir lok næstu viku.
Undirbúningskjörbréfanefnd stefnir að því að ljúka skoðun sinni á meðferð kjörgagna í Norðvesturkjördæmi fyrir lok næstu viku. vísir/egill

Samfylkingin fengi kjördæmakjörinn þingmann í Norðvesturkjördæmi á kostnað þriðja þingmanns Framsóknarflokksins í kjördæminu ef kosið yrði nú samkvæmt könnun Maskínu fyrir fréttastofuna. Sjálfstæðisflokkurinn bætti við sig uppbótarþingmanni.

Undirbúningskjörbréfanefnd Alþingis lýkur væntanlega innan viku skoðun sinni á framkvæmd kosninganna í Norðvesturkjördæmi þar sem í megindráttum má sjá fyrir sér þrjár mögulegar niðurstöður. Að fyrri talning atkvæða í kjördæminu verði látin gilda, seinni talningin gildi eða að boðað verði til uppkosninga í kjördæminum.

Slík kosning færi fram á sömu forsendum og kosningarnar hinn 25. september, sömu framboðslistar yrðu í boði og farið yrði eftir sömu kjörskrá og þá var í gildi.

Ef boðað yrði til uppkosninga gætu úrslitin að sjálfsögðu orðið önnur en í nýliðnum alþingiskosningum. Það þýðir að breyting gæti orðið á skiptingu kjördæmakjörinna þingmanna í kjördæminu og á útdeilingu jöfnunarþingmanna á landsvísu. Og það yrði einmitt raunin samkvæmt nýrri könnun Maskínu fyrir fréttastofuna.

Hér sést fjöldi þingmanna hvers flokks eins og hann er núna eftir kosningarnar í dökklituðu súlunum og eins og fjöldinn yrði samkvæmt könnun Maskínu í ljósari súlunum.Grafík/Helgi

Samkvæmt könnuninni sem gerð var frá 26. október til 4. nóvember breytist fylgi flestra flokka í kjördæminu lítið nema fylgi Samfylkingarinnar sem eykst úr 6,9 prósentum í 8,9 eða um tvö prósentustig. Það dygði Samfylkingunni til að ná inn manni í kjördæminu sem hún hafði ekki áður og Framsóknarflokkurinn missir þriðja þingmann sinn þar. Þannig myndi Halla Signý Kristjánsdóttir víkja af þingi fyrir Valgarði Lyngdal Jónssyni.

Svona lítur listi kjördæmakjörinna þingmanna Norðvesturkjördæmis út í dag þar sem Bergþór Ólason er að auki jöfnunarþingmaður. Samkvæmt könnun Maskínu dytti Halla Signý Kristjánsdóttir Framsóknarflokki út af þingi og Valgarður Lyngdal Jónsson Samfylkingu kæmi inn í hennar stað.Grafík/Helgi

Ef könnun Maskínu gengi eftir yrði líka breyting á jöfnunarþingönnum í Suðvesturkjördæmi. Píratinn Gísli Rafn Ólafsson dytti út af þingi og í hans stað kæmi Arnar Þór Jónsson inn á þing sem fimmti þingmaður Sjálfstæðisflokksins í kjördæminu.

Svona liti þingmannalistinn í Suðvesturkjördæmi út samkvæmt könnun Maskínu. Arnar Þór Jónsson Sjálfstæðisflokki kæmi inn sem annar jöfnunarþingmaður kjördæmisins og tæki þar með sæti Gísla Rafns Ólafssonar Pírata.Grafík/Helgi

Þetta myndi þó ekki breyta samanlögðum þingmannafjölda stjórnarflokkanna annars vegar og stjórnarandstöðuflokkanna hins vegar. Sjálfstæðisflokkurinn færi úr 17 þingmönnum í átján, Framsóknarflokkurinn úr þrettán í tólf stjórnarmeginn og Píratar færu úr sex þingmönnum í fimm en Samfylkingin úr sex í sjö stjórnarandstöðumeginn.


Tengdar fréttir

Undir­búnings­kjör­bréfa­nefnd á vett­vang talningar í Borgar­nesi

Undirbúningskjörbréfanefnd Alþingis fundar í dag á hótel Borgarnesi þar sem talning fór fram í Norðvesturkjördæmi í nýafstaðnum alþingiskosningum. Formaður nefndarinnar segir mikilvægt að nefndin vandi til verka þótt æskilegt væri að uppkosning færi fram sem fyrst ef niðurstaðan yrði að endurtaka þyrfti kosningarnar í kjördæminu.

Yfirstjórn í NV biður kjósendur og frambjóðendur afsökunar

Yfirkjörstórn í Norðvesturkjördæmi biður frambjóðendur til Alþingis og kjósendur afsökunar á þeim mistökum sem áttu sér stað við talningu atkvæða í kjördæminu. Yfirkjörstjórnin harmar þá stöðu sem upp er komin. Framkvæmd kosninga hefur bæði verið kærð til lögreglu og kjörbréfanefndar.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.