Fótbolti

Pogba og McCartney bjuggu til vegan takkaskó

Sindri Sverrisson skrifar
Paul Pogba með takkaskóna sína.
Paul Pogba með takkaskóna sína.

Knattspyrnumaðurinn Paul Pogba og fatahönnuðurinn Stella McCartney tóku höndum saman og hönnuðu hundrað prósent vegan takkaskó sem ætlaðir eru báðum kynjum.

BBC fjallar um þetta og bendir á að færst hafi í aukana að knattspyrnufólk sé vegan og kjósi þannig að nota ekki dýraafurðir.

Chris Smalling, varnarmaður Roma, er til að mynda einn þeirra, enska D-deildarfélagið Forest Green Rovers er vegan knattspyrnufélag, og Chelsea varð í fyrra fyrsta enska úrvalsdeildarfélagið til að setja upp veganmatsölustað á heimavelli sínum.

Pogba og McCartney hafa nú þróað knattspyrnuskó með Adidas sem eru algjörlega vegan og gerðir úr endurunnu efni. United-maðurinn segir þau McCartney hafa tekið ákvörðunina þegar fótboltabann ríkti vegna kórónuveirufaraldursins, vorið 2020.

„Þetta var í miðju samkomubanni og ég saknaði fótboltans mikið, svo það var dásamlegt að geta einbeitt sér að einhverju sem sameinar ást mína á íþróttinni og ástríðu mína fyrir tísku,“ sagði Pogba.

„Ég er fyrst og fremst knattspyrnumaður en ég hef líka gríðarlegan áhuga á tísku og hönnun og hef alltaf viljað kynnast því nánar,“ sagði Pogba og kvaðst ekki geta beðið eftir að klæðast nýju skónum í leik. Næsti leikur United er stórleikurinn við Liverpool á sunnudag.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.