Fótbolti

Hákon Rafn hélt hreinu í stór­leiknum gegn Djurgården og Alex Þór skoraði sigur­mark Öster

Runólfur Trausti Þórhallsson skrifar
Hákon Rafn stóð vaktina i marki Elfsborg í kvöld.
Hákon Rafn stóð vaktina i marki Elfsborg í kvöld. Elfsborg

Það var nóg um að vera í Allsvenskan og Superettan í Svíþjóð í kvöld. Alls voru þrír Íslendingar í eldlínunni sem og tveir á bekknum sem komu ekki við sögu.

Markvörðurinn Hákon Rafn Valdimarsson hélt sæti sínu í byrjunarliði Elfsborg og hélt marki sínu hreinu þar sem liðið vann þægilegan 3-0 sigur á Djurgården. Í hinum leik Allsvenskan í kvöld vann Häcken 5-0 stórsigur á Norrköping.

Ari Freyr Skúlason lék allan leikinn í liði Norrköping og nældi sér í gult spjald á 84. mínútu leiksins. Valgeir Lunddal Friðriksson sat allan tímann á varamannabekk Häcken en Óskar Sverrisson kom inn af bekknum í uppbótartíma.

Sigur Elfsborg kemur liðinu almennilega inn í toppbaráttu deildarinnar en liðið er nú með 42 stig, aðeins tveimur minna en Malmö, Djurgården og AIK sem eru jöfn á toppnum með 44 stig. Nörrköping er í 5. sæti með 39 stig á meðan Häcken er í 8. sæti með 31 stig.

Alex Þór Hauksson skoraði sitt annað mark fyrir Öster í kvöld. Alex Þór tók skot af löngu færi sem fór í varnarmann og þaðan yfir markvörð Vasalunds. Reyndist það sigurmark liðsins í 3-2 sigri.

Öster er því nú í 7. sæti með 35 stig.




Fleiri fréttir

Sjá meira


×