Jamal Musiala var með markinu sínu sá næstyngsti til að skora fyrir þýska landsliðið og sá yngsti í meira en heila öld eða síðan Marius Hiller skoraði árið 1910.

Musiala er fæddur í Þýskalandi og þaðan er móðir hans. Faðir hans er aftur á móti enskur. Strákur spilaði með unglingalandsliðum beggja þjóða en valdi á endanum Þýskaland.

Markið sem hann skoraði kom í leik á móti Norður Makedóníu en með sigri þar þá tryggði þýska landsliðið sér sigur í riðli Íslands og um leið sæti á HM í Katar, fyrst Evrópuþjóða.

Breska ríkisútvarpið fjallar um leikmanninn sem enska landsliðið missti af og ræðir við hann um ferilinn til þessa.

Musiala er þegar búinn að spila 48 leiki fyrir stórlið Bayern og er kominn með ellefu mörk og einn þýskan meistaratitil. Hann er því þegar búinn að afreka mikið þrátt fyrir ungan aldur.

Móðir hans var við nám við háskólann í Southampton á sínum tíma og hann æfði aðeins með Southampton liðinu. Þar kom Chelsea auga á hann og buðu honum á reynslu sem hann samþykkti.

Hann kunni ekki enskuna á þessum tíma en náði henni á sex mánuðum. Musiala var í átta ár hjá Chelsea og fékk á þeim tíma tækifæri með unglingalandsliðum Englands. Hann náði reyndar að spila fyrir sextán ára landslið Englands og Þýskalands.

Hann valdi hins vegar að fara aftur til Þýskalands og ganga til liðs við Bayern München þegar hann var sextán ára gamall.

„Bayern München setti fram gott plan yfir það hvernig ég myndi fara upp aldursflokkana og lagði áherslu á að það yrði ekki gert í neinum flýti. Ég treysti því sem þeir sögðu. Núna er þetta mjög þægilegt,“ sagði Jamal Musiala.

„Ég var mjög stressaður til að byrja með enda horfðu bara á stjörnuleikmenn liðsins þá. Þú ert alltaf að rekast á Robert Lewandowski og það er ekkert eðlilegt,“ sagði Musiala.

„Eftir ákveðinn tíma þá var það bara venjan og ég get sagt að þeir séu orðnir vinir mínir núna,“ sagði Musiala.

Musiala er ekki orðinn nítján ára en ætti samt að vera kominn með bílpróf. Svo er þó ekki.

„Mamma mín skutlar mér ennþá á æfingarnar og nær í mig líka. Það er í góðu lagi. Það er þægilegt en ég er að vinna í að fá bílprófið. Ég ætti að ná því á næstu vikum,“ sagði Musiala.

„Stundum vildi ég helst ekki hugsa um það því þetta var mjög erfið ákvörðun. Á endanum gerði ég það sem ég taldi vera best fyrir mig og valdi hvar mér myndi líða best. Ég valdi Þýskaland og það er ekkert hægt að horfa til baka með það,“ sagði Musiala.

„Það er allt á réttri leið. Mér finnst ég hafa tekið rétta ákvörðun þrátt fyrir að Englandi hafi komist alla leið í úrslitaleikinn á EM. Ég sé ekki eftir neinu,“ sagði Musiala.

Það má lesa alla umfjöllunina um hann hér.