Erlent

Þing­nefnd gefur fyrstu við­brögðum bresku stjórnarinnar al­gera fall­ein­kunn

Atli Ísleifsson skrifar
Boris Johnson er forsætisráðherra Bretlands.
Boris Johnson er forsætisráðherra Bretlands. Getty

Fyrstu viðbrögð breskra stjórnvalda vegna faraldurs kórónuveirunnar fá algera falleinkunn og er aðgerðaleysið á fyrstu dögum og vikum faraldursins sagt vera einn mesti misbrestur breskra stjórnvalda þegar kemur að því að tryggja lýðheilsu bresku þjóðarinnar í sögunni.

Þetta kemur fram í nýrri skýrslu breskrar þingnefndar. Þar segir að nálgun breskra stjórnvalda, sem naut stuðnings vísindamanna, hafi snúist um að reyna að ná hjarðónæmi með smitum meðal fólks, snemma í ferlinu. Þetta leiddi til að tafir urðu á að gripið var til lokunar samfélagsins, útgöngubanns og samkomutakmarkana.

Þingnefndin sagði bresku stjórninaþó  einnig hafa náð góðum árangri á öðrum sviðum í baráttunni við faraldurinn, sér í lagi þegar kemur að bólusetningum. Allt frá fyrstu stigum – rannsóknum og þróun nýrra bóluefna – og fjöldabólusetningarnar sjálfar eru sagðar eitt „skilvirkasta framtak í sögu Bretlands“, að því er segir í frétt BBC.

Fyrstu tilfelli kórónuveirunnar komu upp í Bretlandi þann 31. janúar 2020 og var ekki tilkynnt um samkomutakmarkanir og útgöngubann fyrr en 23. mars sama ár.

Þingnefndin, sem er með þingmenn úr öllum flokkum innanborðs, skilaði í dag hinni um 150 síðna skýrslu sem lengi hefur verið beðið eftir.

Alls hafa 8,2 milljónir manna smitast af kórónuveirunni í Bretlandi frá upphafi faraldursins og eru um 140 þúsund dauðsföll rakin til Covid-19.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.