Leedsari breytti leiknum fyrir Brasilíu­menn í nótt

Brasilíska liðið vann 3-1 útisigur á Venesúela og er því áfram með fullt hús á toppi Suður-ameríku riðilsins.

Brasilíumenn voru þó 1-0 undir í hálfleik þegar Tite þjálfari kallaði á Raphinha, vængmann Leeds United.

Raphinha átti frábæra innkomu og lagði upp tvö mörk í þriggja marka hálfleik og gestirnir frá Brasilíu unnu 3-1.

„Tite bað mig bara um að gera það sem ég geri hjá Leeds,“ sagði Raphinha eftir leikinn og bætti við: „Ég held að ég hafi ekki ollið honum, liðfélögunum eða stuðningsmönnum Brasilíu vonbrigðum,“ sagði Raphinha.

Hann er 24 ára gamall og var að spila sinn fyrsta landsleik. Raphina kom til Leeds frá Rennes í Frakklandi árið 2020.

Brasilía hafði fyrir leikinn ekki tapað í átján leikjum í undankeppni stórmóts og var með átta sigra í átta leikjum í undankeppni HM í Katar 2022.

Raphina kom inn á fyrir Everton Ribeiro í hálfleik og þá komu líka inn þeir Vinicius Jr og Antony.

Marquinhos jafnaði með skalla á 71. mínútu eftir hornspyrnu Raphinha og Gabriel Barbosa kom Brasilíu síðan yfir úr vítaspyrnu. Antony, sem leikur með Ajax, innsiglaði síðan sigurinn eftir fyrirgjöf frá Raphina.

Raphina hafði verið valinn í fyrsta skiptið í síðasta glugga en fékk þá ekki að koma vegna COVID-19 reglna.

„Ég var mjög óþreyjufullur að spila minn fyrsta leik og það ágerðist bara eftir að ég mátti ekki kom síðasta. Þá varð ég enn ákafari að fá að klæðast brasilísku landsliðstreyjunni,“ sagði Raphinha.

„Það var mjög gott fyrir mig persónulega að fá þessar mínútur og geta hjálpað liðsfélögum mínum inn á vellinum,“ sagði Raphinha.

Það gekk ekki eins vel hjá nágrönnunum í Argentínu sem náðu bara markalausu jafntefli á móti Paragvæ á útivelli. Úrúgvæ gerði líka markalaust jafntefli en á heimavelli á móti Kólumbíu.

Báðar þjóðir eru í hópi þeirri fjögurra sem nú sitja í sæti sem gefur þátttökurétt á HM. Brasilíumenn eru efstir með 27 stig, Argentínumenn eru með 19 stig, Ekvadorar og Úrúgvæjar eru síðan með 16 stig, tveimur stigum á undan Kólumbíu sem situr í fimmta sætinu.

Fjórar efstu þjóðirnar fara beint á HM en fimmta sætið gefur þátttökurétt í umspili með þjóðum úr öðrum álfum.