Fótbolti

Emil leikur aftur í Verónaborg

Sindri Sverrisson skrifar
Emil Hallfreðsson verður sá fyrsti til að klæðast treyju Virtus Verona sem EM- og HM-fari.
Emil Hallfreðsson verður sá fyrsti til að klæðast treyju Virtus Verona sem EM- og HM-fari. Facebook/@usvirtusbv

Emil Hallfreðsson mun spila í ítölsku C-deildinni í fóbolta í vetur með liði Virtus Verona. Þessi 37 ára gamli leikmaður skrifaði undir samning sem gildir út júní á næsta ári.

Emil hafði verið án félags frá því í sumar eftir að hafa síðast leikið með Padova í C-deildinni, þar sem hann kom við sögu í 34 leikjum á síðustu leiktíð. Útlit var fyrir að hann færi svo til Sona Calcio í ítölsku D-deildinni í sumar en ekkert varð af því.

Í tilkynningu frá Virtus Verona er þess getið að Emil verði fyrsti leikmaðurinn til að klæðast búningi liðsins sem leikið hafi í lokakeppni EM og HM.

Emil hefur lengst af síns ferils spilað á Ítalíu og lék með stærra liðinu af þeim tveimur sem nú eru starfandi í Verónaborg, Hellas Verona, á árunum 2010-2016. Á Ítalíu hefur hann einnig leikið með Padova, Udinese, Frosinone og Reggina.

Emil hóf ferilinn hjá FH en fór tvítugur til Tottenham Hotspur á Englandi. Hann lék svo í Svíþjóð og Noregi áður en hann fór fyrst til Ítalíu sumarið 2007 til að spila fyrir Reggina.

Emil á að baki 73 A-landsleiki en spilaði síðast með landsliðinu fyrir rúmu ári síðan, í tveimur leikjum í Þjóðadeildinni undir stjórn Eriks Hamrén.




Fleiri fréttir

Sjá meira


×