Innlent

Skothylkin fuku í vindinum í Rauðagerði

Hallgerður Kolbrún E. Jónsdóttir og Kolbeinn Tumi Daðason skrifa
Frá vettvangi í Rauðagerði daginn eftir skotárásina.
Frá vettvangi í Rauðagerði daginn eftir skotárásina. Vísir/Vilhelm

Lögreglukona sem bar vitni í Rauðagerðismálinu í dómsal í morgun segir að skothylki hafi fokið til í vindinum í Rauðagerði þegar hana bar að garði. Önnur lögreglukona sagðist ekki hafa verið meðvituð um að skotárás hefði átt sér stað þegar hún mætti á vettvang.

Fjórir eru ákærðir fyrir manndráp í Rauðagerði laugardagskvöldið 13. febrúar. Angjelin Sterkaj er sakaður um að hafa skotið Armando Beqirai til bana. Shpetim Qerimi, Murat Selivrada og Claudia Sofia Coelho Carvalho eru sömuleiðis ákærð hvert fyrir sinn þáttinn sem leiddi til þess að Armando var skotinn til bana. Þau fjögur báru vitni í dómssal í gær. Angjelin ber fyrir sig sjálfsvörn en hin þrjú segjast ekkert hafa vitað um manndrápið.

Vissi ekki að um skotárás væri að ræða

Lögreglukona sem var með þeim fyrstu á staðinn umrætt kvöld lýsti því að tilkynning hefði borist um meðvitundarlausan mann fyrir utan hús í Rauðagerði.

„Maður heyrði að þetta var alvarlegt. Þegar við komum var hann meðvitundarlaus inni í sjúkrabíl,“ sagði lögreglukonan. Hún hafi þá ekki haft upplýsingar að um skotárás hefði verið að ræða. Þær upplýsingar hafi ekki borist fyrr en lögreglubíllinn hafi fylgt sjúkrabílnum upp á slysadeild.

Þeim hafi verið sagt seinna að þetta hafi líklega verið skotárás.

„Maður fór ekki með hausinn þangað að þetta hefði verið skotárás.“

Vinir Armandos mættu á vettvang

Hún lýsti aðstæðum á vettvangi umrætt laugardagskvöld. Dimmt hefði verið úti, fínt veður en svolítið rok. Sérsveitin hafi mætt á vettvang og fundið skothylki.

Þá hafi vinir Armandos mætt á vettvang en þeir verið beðnir um að halda sig utan dyra. Lögreglukonan mundi ekki hvort þeir hefðu komið inn í húsið en þeim hefði allavega ekki verið hleypt inn í bílskúr, þar sem Armando var skotinn til bana.

Önnur lögreglukona sem mætti síðar á vettvang, þegar Armando hafði verið fluttur á brott í sjúkrabíl, sagðist hafa fundið skothylki á vettvangi og blóð við bílskúrshurðina. Þau hafi farið í að tryggja sönnunargögn, mynda svæðið og skoða bílskúrinn.

„Svo var innsiglað og vaktað þar til birti. Nánari rannsókn fór fram morguninn eftir því það var svo dimmt um nóttina.“

Skothylkin fuku í vindinum

Lögreglukonan lýsti því að svo hvasst hefði verið að skothylkin á bílaplaninu hefðu fokið til. Skothylkin nær garðinum héldust kyrr væntanlega vegna skjóls frá runnunum.

Fram hefur komið að Armando var skotinn níu sinnum.

Lögreglukonan sagði að bílskúrinn hefði verið myndaður og skoðaður en ekki rótað í bílskúrnum. Svo hafi hann verið innsiglaður.

Hún hefði ekki séð nein vopn í hillum, ekkert óeðlilegt. Hún sagðist ekki geta útilokað að þar hafi verið byssa en þá hefði hún verið vel falin.

Byssan fullhlaðin þegar hún fannst

Angjelin lýsti því við aðalmeðferðina í gær að Armando hefði verið vopnaður og því hefði hann skotið Armando í sjálfsvörn.

Lögreglukonan lýsti því einnig þegar morðvopnið fannst nærri Esjurótum nokkrum dögum síðar. Hljóðdeyfirinn hefði verið skrúfaður á og vopnið verið fullhlaðið.

Hún sagðist ekki hafa flett upp hver væri skráður fyrir vopninu en lagt áherslu á að tryggja vörslu þess.


Tengdar fréttir

Bílstjóri Angjelins segist hafa komið fullkomlega af fjöllum

Shpetim Qerimi, sem er sakaður um að eiga hlutdeild í morðinu á Armando Beqirai í Rauðagerði í febrúar, neitaði sök við skýrslutöku í Héraðsdómi Reykjavíkur í dag. Shpetim er sagður hafa ekið Angjelin Sterkaj í Rauðgerði kvöldið sem Angjelin skaut Armando til bana.

Átti að senda „hæ sexy“ ef annar bíllinn yrði hreyfður

Aðalmeðferð í Rauðagerðismálinu var framhaldið eftir hádegi í dag þar sem tekin var skýrsla af Claudiu Sofiu Coehlo Carvalho, unnustu Angjelin Sterkaj, sem hefur játað að hafa myrt Armando Beqirai í Rauðagerði í febrúar síðastliðnum.

Segir Armando og félaga hans hafa viljað 50 milljónir frá Antoni Kristni

Angjelin Sterkaj segist hafa verið einn að verki þegar hann skaut Armando Beqirai til bana í Rauðagerði í Reykjavík í febrúar síðastliðnum. Angjelin segir Armando og Goran Kristján Stojanovic hafa viljað hvor um sig 25 milljónir frá Antoni Kristni Þórarinssyni.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.