Frá Alþjóðlegu geimstöðinni á braut um jörðina.ESA/Thomas Pesquet
Viðvörunarkerfi í rússneska hluta Alþjóðlegu geimstöðvarinnar á braut um jörðu fór í gang þegar reykur greindist um borð. Geimfarar eru sagðir hafa ýmist séð reyk eða fundið lykt af brenndu plasti.
Reykskynjari fór í gang í svonefndu Zvezda-hylki þar sem áhöfn geimstöðvarinnar býr. Rafhlöður voru í hleðslu í hylkinu. Sjö geimfarar eru um borð í geimstöðinni.
Rússneska geimstofnunin Roscosmos segir að öll kerfi geimstöðvarinnar hafi virkað eftir að reykurinn greindist. Áform um geimgöngu síðar í dag eru óbreytt, að því er segir í frétt Reuters-fréttastofunnar.
Oleg Novitskí, rússneskur geimfari um borð í geimstöðinni, er sagður hafa séð og fundið lykt af reyk og Thomas Pesquet, franskur kollegi hans, hafa fundið lykt af brenndu plasti eða rafeindabúnaði sem lagði frá rússneska hluta geimstöðvarinnar inn í þann bandaríska.
Röð óhappa hefur orðið í Alþjóðlegu geimstöðinni, sem er komin nokkuð til ára sinna, upp á síðkastið. Rússneskir embættismenn telja að hugbúnaðarbilun eða möguleg mannleg mistök hafi valdið því að öll geimstöðin færðist úr hefðbundinni stöðu sinni í júlí.
Eftir að ný rússnesk eining var tengd við Alþjóðlegu geimstöðina í dag, kviknaði óvænt á hreyflum einingarinnar svo geimstöðin færðist úr stöðu sinni á braut um jörðu. Hreyflarnir voru í gangi í nokkrar mínútur og voru hreyflar annarra eininga geimstöðvarinnar notaðir til að vega upp á móti hinum.
Alþjóðlega geimstöðin varð fyrir geimrusli í síðasta mánuði sem olli skemmdum á kanadíska vélarminum svokallaða. Armurinn virkar þó enn og virðist sem að ruslið hafi eingöngu valdið skemmdum á hitaskildi hans.
Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.
