Fótbolti

Vålerenga hellist aftur úr í toppbaráttunni

Valur Páll Eiríksson skrifar
Ingibjörg Sigurðardóttir, þriðja frá hægri í efri röð, var að vanda í byrjunarliði Vålerenga í dag.
Ingibjörg Sigurðardóttir, þriðja frá hægri í efri röð, var að vanda í byrjunarliði Vålerenga í dag. Twitter/@VIFDamer

Landsliðskonan Ingibjörg Sigurðardóttir spilaði allan leikinn fyrir Noregsmeistara Vålerenga sem töpuðu 1-0 fyrir toppliði Sandviken í norsku úrvalsdeildinni í fótbolta í Osló í dag.

Ingibjörg lék að venju allan leikinn í hjarta varnar Vålerenga sem þurfti sigur til að halda vonum sínum í toppbaráttunni á lífi. Markalaust var allt fram á 79. mínútu leiksins þegar Lisa Fjeldstad Naalsund skoraði eina mark leiksins fyrir Sandviken.

Sandviken treystir þannig stöðu sína á toppi deildarinnar þar sem liðið er með 34 stig af 36 mögulegum eftir tólf leiki. Vålerenga er hins vegar með 23 stig í fjórða sæti.

Þar fyrir ofan eru Rosenborg með 27 stig í öðru sæti og Lilleström með 25 stig í því þriðja. Bæði eiga þau leik inni á Sandviken og Vålerenga eftir leik dagsins.

Amanda Andradóttir sat allan tímann á varamannabekk Vålerenga í leiknum.




Fleiri fréttir

Sjá meira


×