Íslenski boltinn

Fyrstur til að halda hreinu á móti Ís­lands­meisturunum í meira en ár

Óskar Ófeigur Jónsson skrifar
Guy Smit er mjög flottur markvörður og mikill happafengur fyrir Leiknismenn.
Guy Smit er mjög flottur markvörður og mikill happafengur fyrir Leiknismenn. Vísir/Hulda Margrét

Guy Smit, markverði Leiknis, tókst það í gær sem engum öðrum markverði Pepsi Max deildarinnar hafði tekist síðan um miðjan júlímánuð 2020.

Smit hélt nefnilega marki sínu hreinu þegar nýliðar Leiknis unnu 1-0 sigur á Íslandsmeisturum Vals í 16. umferð Pepsi Max deild karla í fótbolta í gær.

Sá síðasti til að halda hreinu í deildarleik á móti Val var Stjörnumarkvörðurinn Haraldur Björnsson sem náði því í markalausu jafntefli 13. júlí 2020. Síðan var liðinn 391 dagur.

Frá þessum leik í sjöttu umferðinni í fyrra þá höfðu Valsmenn skorað í 27 deildarleikjum í röð fyrir leikinn í Efra Breiðholtinu í gær.

Valsliðið hafði skorað í fimmtán fyrstu deildarleikjum sínum í sumar og Valsmenn skoruðu einnig í tólf síðustu deildarleikjum sínum þegar þeir tryggðu sér Íslandsmeistaratitilinn í fyrrasumar.

Tveir markmenn héldu hreinu á móti Val í Pepsi Max deildinni í fyrra því auk Haraldar þá hélt KR-markvörðurinn Beitir Ólafsson einnig marki sínu hreinu í fyrstu umferðinni. Það var líka síðasti leikurinn þar sem Valsmenn skoruðu hvorki mark né fengu stig í deildinni þar til á Domusnovavellinum í gær.

Þetta er reyndar ekkert nýtt hjá Guy Smit því hann var þarna að halda marki sínu hreinu í fjórða sinn í síðustu fimm deildarleikjum og alls í sjötta sinn á tímabilinu.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.