Fótbolti

Midtjylland þoldi stórtap án Mikaels

Valur Páll Eiríksson skrifar
Mikael Anderson er enn frá eftir að hafa smitast af COVID-19 í síðustu viku.
Mikael Anderson er enn frá eftir að hafa smitast af COVID-19 í síðustu viku. Jonathan Moscrop/Getty

Danska liðið Midtjylland tapaði 3-0 fyrir hollenska stórliðinu PSV Eindhoven í fyrri leik liðanna í 3. umferð í forkeppni Meistaradeildar Evrópu í fótbolta í kvöld. Mikael Anderson var ekki í leikmannahópi danska liðsins vegna COVID-smits.

Mikael greindist með veiruna í síðustu viku og hefur verið frá síðan. Hann missti af sigri danska liðsins á Celtic frá Skotlandi til að tryggja sæti sitt í þriðju umferðinni en andstæðingar kvöldsins virðast hafa verið of stór biti fyrir félagið.

Noni Madueke kom PSV yfir eftir stoðsendingu Ísraelans Eran Zahavi eftir 19. mínútna leik og Mario Götze, hetja Þýskalands frá HM 2014, tvöfaldaði forystu þeirra hollensku tíu mínútum síðar. Zahavi lagði þá upp annað mark sitt í leiknum fyrir Cody Gakpo á 32. mínútu.

3-0 stóð í leikhléi og voru þeir dönsku aldrei líklegir til að koma til baka. Þeir voru 32% með boltann í leiknum og náðu ekki einni marktilraun og rammann hjá PSV. Þeir hollensku héldu 3-0 forystunni til loka og það urðu úrslit leiksins.

Síðari leikur liðanna fer fram eftir viku í Danmörku en þá ætti Mikael Anderson að vera kominn aftur á ról með Midtjylland.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.