Árni Vilhjálmss.: Ótrúlega góð samheild hjá liðinu

„Ég held að allir sem hafi horft á þennan leik í dag hafi séð að það var liðsheildin sem skilaði sigirinum í dag fyrir okkur. Alveg frá fyrsta manni til hins síðasta og öllum sem hafa tekið þátt í þessu með okkur. Þetta hefur verið ótrúlega góð samheild hjá liðinu alveg frá því að mótið byrjaði í vor og svo þegar þessi keppni byrjaði. Það sést helst á því að hvernig við pressum og á varnarvinnunni og hlaupunum og öllu sem við gerðum í dag. Það er ekki hægt að þakka neinum einum í dag heldur öllum hópnum“, sagði Árni Vilhjálmss. þegar hann var spurður að því hverju Blikar gætu þakkað að hafa slegið út Austria Wien.

Hann var næst spurður að því hvort upplegg gestanna hafi komið honum og liðinu á óvart. Blikar gátu fundið pláss á köntunum og í teignum til að skora mörk og svo var pressa Austurríkismanna ekki mikil. 

„Í raun og veru vorum við búnir að sjá það út hvernig þeir spiluðu. Við sáum að við gátum sett pressu á þá og við erum góðir í því. Við erum snöggir fram á við og getum hlaupið mikið og þegar það tekst þá getum við oftast unnið boltann hátt uppi. Það er auðveldara fyrir okkur að spila hátt upp þannig. Maður pælir samt ekkert í því hvernig liðin spila, maður bara vinnur úr augnablikunum sem maður fær í leiknum. Við sýndum það í færunum okkar og essum mörkum sem við skoruðum í dag.“