Innlent

Tveir greinst innan­lands frá því á fimmtu­dag

Atli Ísleifsson skrifar
223.719 teljast nú fullbólusettir hér á landi, 75,8 prósent íbúa sextán ára og eldri.
223.719 teljast nú fullbólusettir hér á landi, 75,8 prósent íbúa sextán ára og eldri. Vísir/Vilhelm

Tveir hafa greinst með kórónuveiruna innan­lands frá því á fimmtu­dag - einn á fimmtudag og einn á laugardag. Báðir voru utan sóttkvíar við greiningu.

Þetta kemur fram í uppfærðum tölum á síðunni covid.is sem er nú uppfærð einungis á mánudögum og fimmtudögum.

Hjördís Guðmundsdóttir, upplýsingafulltrúi, segir í samtali við fréttastofu að bæði smitin tengjast landamærum. Niðurstöðu raðgreiningar er beðið í tilviki annars smitsins.

Í einangrun eru nú 28, en þeir voru 24 á fimmtudag. Í sóttkví er 80, en voru 86 á fimmtudag. 2064 eru í skimunarsóttkví. Einn er nú á sjúkrahúsi vegna Covid-19, sami fjöldi og var í síðustu viku.

Alls hafa átta manns greinst með kórónuveiruna á landamærum síðan á fimmtudag.

Nýgengi á smiti innanlands, þ.e. fjöldi smitaðra á hverja 100 þúsund íbúa undanfarnar tvær vikur, er nú 2,5, en var 1,9 í gær. Nýgengi á smiti á landamærum er nú 6,3, en var 5,5 á fimmtudaginn.

223.719 eru nú fullbólusettir hér á landi, 75,8 prósent íbúa sextán ára og eldri, og er bólusetning hafin hjá 38.332 til viðbótar, eða 12,9 prósent íbúa sextán ára og eldri.

6.664 hafa nú greinst með kórónuveiruna hér á landi frá upphafi faraldursins í febrúar á síðasta ári. Af þeim sem greinst hafa með COVID-19 á Íslandi eru þrjátíu látin.

Alls voru tekin 82 einkennasýni hjá sýkla- og veirufræðideild Landspítalans og Íslenskri erfðagreiningu í gær. Þá voru 771 sýni tekin á landamærunum eða í seinni landamæraskimun og 632 í svokallaðri sóttkvíar- og handahófsskimun.

Fréttin hefur verið uppfærð. 



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.