Menning

„Peps“ Persson fallinn frá

Atli Ísleifsson skrifar
Skánsk mállýska setti mikinn svip á tónlist Peps Persson.
Skánsk mállýska setti mikinn svip á tónlist Peps Persson. Facebook

Sænski tónlistarmaðurinn Peps Persson er fallinn frá, 74 ára að aldri. Umboðsmaður Perssons segir að hann hafi látist á laugardaginn, eftir að hafa glímt við veikindi um nokkurt skeið.

Tónlistarmaðurinn, sem hét Per-Åke Persson réttu nafni, var þekktur fyrir blús- og reggítónlist sína sem hann söng á sinni þekktu skánsku mállýsku.

Persson gaf út fjölda þekktra laga með sveit sinni Peps Blodsband sem stofnuð var á áttunda áratugnum, meðal annars lagið Falsk matematik sem var á sænska vinsældalistanum í fimmtán vikur árið 1973 og lagið Hög standard frá 1975. 

Sömuleiðis naut lagið Oh Boy! mikilla vinsælda þar sem hann söng um sænska sumarveðrið árið 1992.

Peps Persson vann á ferli sínum með fjölda annarra sænskra tónlistarmanna, þeirra á meðal Nisse Hellberg, Wilmer X og Timbuktu.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.