Íslenski boltinn

Rúnar getur nú stillt upp sömu framlínu og síðast þegar KR vann tvöfalt

Ingvi Þór Sæmundsson skrifar
Gamla bandið hvað?
Gamla bandið hvað? vísir/getty/hulda margrét/vilhelm

Eftir komu Kjartans Henrys Finnbogasonar getur KR nú stillt upp sömu framlínu og þegar liðið varð síðast tvöfaldur meistari fyrir áratug.

Þeir Kjartan, Guðjón Baldvinsson og Óskar Örn Hauksson voru fyrstu kostir Rúnars Kristinssonar í framlínu KR fyrri hluta tímabilsins 2011, eða allt þar til Óskar meiddist um mitt sumar.

Kjartan og Guðjón eru nú komnir aftur í KR eftir mislanga fjarveru en Óskar hefur ekki farið neitt. Rúnar gæti því stillt upp sömu framlínu og þegar KR-ingar unnu bæði deild og bikar fyrir áratug. KR 2011 er síðasta íslenska liðið sem vann tvöfalt.

Kjartan var markahæsti leikmaður KR í Pepsi-deildinni 2011 með tólf mörk. Guðjón kom næstur með átta mörk. Óskar skoraði svo þrjú mörk í þeim ellefu leikjum sem hann spilaði áður en hann meiddist.

Fyrir utan Kjartan, Guðjón og Óskar er Aron Bjarki Jósepsson sá eini úr meistaraliðinu 2011 sem er í leikmannahópi KR í dag. Þá er Rúnar Kristinsson þjálfari KR eins og hann var fyrir áratug.

Óskar og Guðjón eru báðir komnir á blað á þessu tímabili. Óskar skoraði í 0-2 sigri KR á Breiðabliki í 1. umferð Pepsi Max-deildarinnar og Guðjón gerði mark KR-inga í 1-3 tapinu fyrir KA-mönnum í 2. umferðinni.

Kjartan gæti leikið sinn fyrsta leik fyrir KR síðan 2014 þegar liðið fær Val í heimsókn í stórleik 4. umferðar á mánudaginn.

KR sækir Fylki heim í 3. umferð Pepsi Max-deildarinnar í kvöld. Leikurinn hefst klukkan 19:15 og verður sýndur beint á Stöð 2 Sport. Upphitun fyrir leikinn hefst klukkan 18:45.


Pepsi Max deild karla er á Stöð 2 Sport en upplýsingar um útsendingar má finna hér. Pepsi Max deildin er hluti af Stöð 2 Sport Ísland sem kostar 3.990 krónur á mánuði en einnig má kaupa útsendingar sem stakan viðburð á 990 krónur.


Tengdar fréttir

KR staðfestir komu Kjartans Henrys

Kjartan Henry Finnbogason hefur skrifað undir þriggja ára samning við KR. Hann snýr því aftur til uppeldisfélagsins sem hann lék síðast með 2014.




Fleiri fréttir

Sjá meira


×