Ofurdeildarliðin gætu fengið tveggja ára bann frá Meistaradeildinni

Refsiramminn býður upp á tveggja ára bann frá Meistaradeild og Evrópudeild. Heimildarmenn ESPN sem þekkja til hjá UEFA segja að sambandið ætli að refsa þeim félögum harðlega sem eru enn ekki búin að draga sitt „framboð“ til baka.

UEFA hefur verið í samræðum við Ofurdeildarliðin tólf undanfarna tíu daga til að reyna að koma í veg fyrir harðar refsingar en tryggja um leið að svona geti ekki endurtekið sig.

Samkvæmt heimildum ESPN þá hefur UEFA náð samkomulagi við sjö lið af þessum tólf en það eru Arsenal, Atletico Madrid, Chelsea, Liverpool, Manchester City, Manchester United og Tottenham Hotspur. Þessi félög eru því aldrei að fara í langt bann. Nýkrýndir Ítalíumeistarar Internazionale eru líka nálægt því að ná samkomulagi.

Það eru hin fjögur liðin sem eftir standa sem eiga það á hættu að fá mjög harða refsingu og missa jafnvel af Meistaradeildinni í tvö ár. Þetta eru lið Juventus, Real Madrid, Barcelona og AC Milan.

Þessi fjögur félög eru víst mjög mótfallin tilboði UEFA. ESPN segir líka frá því að ef níu af tólf félögum draga sig úr Ofurdeildinni þá felli samkomulagið úr gildi.

Aleksander Ceferin, forseti UEFA, hefur þegar látið eftir sér að það sé mikill munur á ensku félögum sex og hinum sex. Hann liggur í því að ensku félögin voru fyrst til að draga sig út úr Ofurdeildarsamkomulaginu og hafa viðurkennt að þetta hafi verið mistök.

Ceferin talar líka um að UEFA ætli sér að taka hvert félag fyrir sér á leið sinni að því að tryggja að engin Ofurdeild fæðist í framtíðinni.

„Fyrir mér þá eru þetta þrír hópar hjá þessum tólf félögum. Það eru ensku félögin sex sem drógu sig út fyrst, þá næstu þrjú [Atletico Madrid, AC Milan og Inter] og svo þessi félög sem halda að jörðin sé flöt og að Ofurdeildin sé enn á lífi [Barcelona, Real Madrid og Juventus]. Það er mikill munur á þessum félögum. Öll þurfa þau hins vegar að taka sína ábyrgð á þessu. Hvernig verður að koma í ljós,“ sagði Aleksander Ceferin, forseti UEFA.