Innlent

Sennilega sitja þær Katrín og Ás­laug Arna með Svan­dísi í súpunni

Jakob Bjarnar skrifar
Á ríkisstjórnarfundi 30. mars síðastliðinn fjölluðu þær Katrín, Áslaug Arna og Svandísi Svavarsdóttur um stöðu og framkvæmd á landamærunum.
Á ríkisstjórnarfundi 30. mars síðastliðinn fjölluðu þær Katrín, Áslaug Arna og Svandísi Svavarsdóttur um stöðu og framkvæmd á landamærunum. vísir/vilhelm

Dómurinn var afdráttarlaus: Ekki má halda fólki í sóttkví á sóttvarnahóteli ef það á í önnur hús að venda. Samkvæmt heimildum Vísis hyggjast Píratar kalla eftir gögnum sem lágu til grundvallar þegar málið var afgreitt á ríkisstjórnarfundi.

Á fundi ríkisstjórnarinnar 30. mars síðastliðinn voru meðal annars tvö mál á dagskrá: Hið fyrra sneri að Katrínu Jakobsdóttur forsætisráðherra, Áslaugu Örnu Sigurbjörnsdóttur dómsmálaráðherra og Svandísi Svavarsdóttur heilbrigðisráðherra: Staða og framkvæmd á landamærunum. Hið seinna að Svandísi: Aðgerðir á landamærum - ný reglugerð um sóttkví og einangrun og sýnatöku við landamæri Íslands vegna COVID-19.

Höfðu verið vöruð við

Af fundarefni má ráða að þær Katrín Jakobsdóttir og Áslaug Arna hafi komið að hinum ólögmætu aðgerðum auk Svandísar. Vísir hefur heyrt í stjórnarandstöðuþingmönnum í morgun. 

Helga Vala segist ítrekað hafa goldið varhug við því að lagaheimildir fyrir því að vista fólk nauðugt á sóttvarnarhótelum kynnu að vera af skornum skammti.vísir/vilhelm

Nú stendur yfir fundur í velferðarnefnd sem Helga Vala Helgadóttir þingmaður Samfylkingarinnar stýrir. Hún hafði því ekki tök á að tjá sig um málið, sagði þó að hún hafi bent á meinbugi þessara aðgerða áður og oft. Helga Vala vísaði í þingræður, til dæmis frá 28. janúar þar sem hún sagði meðal annars:

„Ekki er heimild fyrir því lengur að skylda fólk í sóttvarnahús en verið er að skýra betur sóttvarnahús þannig að heimildir séu til að opna slíkt hús á vegum stjórnvalda. Ég myndi telja mikilvægt að hafa skýrt valdboð til stjórnvalda um að þeim beri að halda úti sóttvarnahúsi ef þau leggja það á fólk að vera í slíku húsi, þ.e. þegar sú staða er komin upp, tilmæli til fólks um að fara í sóttvarnahús, þá sé um leið skýrt valdboð á stjórnvöldum að hafa slíkt hús til reiðu.“

Svandís viss í sinni sök

Í umræðu tveimur dögum fyrr, undir liðnum „Hertar sóttvarnarreglur, munnleg skýrsla heilbrigðisráðherra, spurði Helga Vala um hvort heilbrigðisráðherra telji „lagaheimildir vera nógu skýrar til þess að skylda alla ferðamenn og heimafólk til dvalar í sóttvarnahúsi ef þau koma frá rauðum löndum“?

Svör Svandísar voru afdráttarlaus. „Virðulegur forseti. Ég þakka hv. þingmanni. Fyrst spurningin um það hvort lagaheimild sé fyrir því að nýta sóttvarnahús. Já, það er lagaheimild fyrir því sem Alþingi afgreiddi hér.“ 

Ráðherra er hér býsna viss í sinni sök en annað átti eftir að koma á daginn ef marka má niðurstöðu Héraðsdóms Reykjavíkur í gær. Sú niðurstaða hefur þó verið kærð til Landsréttar.

Stjórnsýsla Ríkisstjórn Katrínar Jakobsdóttur Faraldur kórónuveiru (COVID-19) Samkomubann á Íslandi Alþingi

Tengdar fréttir

Vill vita hvort Svandís njóti áfram trausts

Gunnar Bragi Sveinsson, þingflokksformaður Miðflokksins, telur að stjórnvöld þurfi að falla frá stefnu sinni um að skylda fólk til dvalar á sóttkvíarhóteli við komuna til landsins.

Þórólfur og Svandís mæta á fund eftir úrskurð héraðsdóms

Svandís Svavarsdóttir heilbrigðisráðherra og Þórólfur Guðnason sóttvarnalæknir munu mæta á fund velferðarnefndar alþingis klukkan tíu. Á fundinum verða rædd næstu skref í sóttvarnaaðgerðum eftir að Héraðsdómur Reykjavíkur úrskurðaði í gær að ríkinu væri óheimilt að skikka fólk til vistar á sóttkvíarhóteli.

Gestum sótt­kvíar­hótels frjálst að ljúka sótt­kví annars staðar

Öllum sem dvelja á sóttkvíarhótelinu í Þórunnartúni er frjálst að ljúka sóttkví annars staðar, hafi þeir viðunandi aðstöðu til þess. Þetta kemur fram í tilkynningu sem send var frá Heilbrigðisráðuneytinu fyrir stuttu. Héraðsdómur Reykjavíkur úrskurðaði síðdegis í dag að ekki teldist lögmætt að skikka komufarþega frá áhættusvæðum í sóttkvíarhús.

Ekki má skikka fólk í sótt­kvíar­hús

Héraðsdómur Reykjavíkur hefur úrskurðað að ekki sé lögmætt að skikka komufarþega frá áhættusvæðum í sóttkvíarhús. Þrjár kærur voru teknar fyrir í héraðsdómi í dag og voru þær byggðar á því að um ólögmæta frelsissviptingu væri að ræða.

Mest lesið


Fleiri fréttir

Sjá meira


×

Mest lesið