Innlent

Gestum sótt­kvíar­hótels frjálst að ljúka sótt­kví annars staðar

Hallgerður Kolbrún E. Jónsdóttir skrifar
Gestum sóttkvíarhótelsins er nú frjálst að ljúka sóttkví annars staðar.
Gestum sóttkvíarhótelsins er nú frjálst að ljúka sóttkví annars staðar. Vísir/Vilhelm

Öllum sem dvelja á sóttkvíarhótelinu í Þórunnartúni er frjálst að ljúka sóttkví annars staðar, hafi þeir viðunandi aðstöðu til þess. Þetta kemur fram í tilkynningu sem send var frá Heilbrigðisráðuneytinu fyrir stuttu. Héraðsdómur Reykjavíkur úrskurðaði síðdegis í dag að ekki teldist lögmætt að skikka komufarþega frá áhættusvæðum í sóttkvíarhús.

„Engu að síður biðla sóttvarnayfirvöld til gesta að ljúka sóttkví á sóttkvíarhótelinu, enda er það besta leiðin til að draga úr útbreiðslu Covid-19 sjúkdómsins,“ segir í tilkynningunni.

Í framhaldinu mun heilbrigðisráðherra í samráði við sóttvarnalækni skoða hvaða leið verður farin til að lágmarka áhættu á að smit berist inn í landið.

„Þetta er alvarleg staða“

Helga Vala Helgadóttir, formaður Velferðarnefndar Alþingis, segir niðurstöðu Héraðsdóms Reykjavíkur um lögmæti sóttkvíarhúsa ekki koma á óvart. 

„Ég hef frá því að heilbrigðisráðherra tilkynnti um fyrirhugaða skyldudvöl í sóttkvíarhúsi spurt bæði í ræðu og riti hvort hún teldi að það væri lagaheimild fyrir þessu af því að ég taldi að svo væri ekki. Hún fullyrti að svo væri,“ segir Helga Vala í samtali við fréttastofu.

Helga Vala Helgadóttir, formaður Velferðarnefndar Alþingis.Vísir/Vilhelm

Velferðarnefnd hefur boðað til fundar á morgun sem Helga segir að fari líklega fram eftir ríkisstjórnarfund. Allir nefndarmeðlimir hafa samþykkt fundarboðið og Svandís Svavarsdóttir heilbrigðisráðherra hefur verið boðuð á fundinn. Nefndinni hefur enn ekki borist svar við fundarboði frá ráðherra.

Á fundinum stendur til að ræða nýjar sóttvarnareglur á landamærunum og sérstaklega það að ferðamenn séu skikkaðir á sóttkvíarhótel.

Treystir Þórólfi í einu og öllu en lagastoð vantar

„Ég bara beið spennt eftir því að sjá hvað dómstólar myndu segja. Af því að þó að ég aðhyllist mjög þessar nauðsynlegu sóttvarnaráðstafanir og treysti Þórólfi í einu og öllu í hans mati þá verður að vera lagastoð fyrir þeim aðgerðum sem farið er í,“ segir Helga Vala.

„Okkur er skylt að passa að lögin séu þannig að við getum farið í nauðsynlegar aðgerðir.“

Helga segir ljóst að lagastoð vanti fyrir viðlíka aðgerðum og sóttkvíarhótelið er. Þegar breytingar á sóttvarnalögum voru samþykktar á þingi í desember voru ýmis ákvæði felld úr frumvarpinu, þar á meðal heimildir til að setja á útgöngubann og að skylda fólk til að halda sóttkví á tilteknum stað.

„Þess vegna var farin þessi millileið, það kom tillaga að breytingum frá stjórnarliðum í nefndinni, sem vildi ekki fara þá leið að setja þetta skýra ákvæði inn í lögin,“ segir Helga.

„Ekki síst fólk sem er búsett hér sem heldur ekki sóttkví“

Ómar Valdimarsson, lögmaður eins þeirra sem höfðaði mál eftir að hafa verið gert að sitja sóttkví á sóttkvíarhótelinu í Þórunnartúni, sagði í samtali við fréttastofu fyrr í dag að í úrskurði dómara hafi komið fram að ein ástæða þess að ákvörðun sóttvarnalæknis hafi verið felld úr gildi sé þar sem hann hafi haft aðstöðu til að ljúka sóttkví á heimili sínu.

Helga Vala segir óvíst hvort úrskurðinn megi einnig heimfæra á fólk sem ekki er búsett hér á landi og geti því ekki setið sóttkví á heimili sínu.

„Nú er það þannig að þetta er ekki síst sett á vegna þess að fólk búsett hér er ekki að halda sóttkví. Þá spyr maður, ef Þórólfur lítur svo á að það þurfi að hafa þetta, verðum við ekki að setja slíka heimild í lögin?“ spyr Helga.

„Ég tel að það sé mikilvægt vegna þess að ég til mikilvægt að frelsi alls almennings á Íslandi verði ekki skert út af einstaka aðilum sem ekki halda sóttkví þrátt fyrir skylduna um það. Við búum við mjög mikla frelsisskerðingu, skólar lokuðu, vinnustaðir, íþróttir og menning lokuðu. Ég held að við séum að fórna þarna meiri hagsmunum fyrir minn með því að gera þetta svona.“

Heilbrigðisráðherra sagði í kvöldfréttum Ríkisútvarpsins að hún hyggðist ekki tjá sig um úrskurðinn að svo stöddu.


Tengdar fréttir

Ekki má skikka fólk í sótt­kvíar­hús

Héraðsdómur Reykjavíkur hefur úrskurðað að ekki sé lögmætt að skikka komufarþega frá áhættusvæðum í sóttkvíarhús. Þrjár kærur voru teknar fyrir í héraðsdómi í dag og voru þær byggðar á því að um ólögmæta frelsissviptingu væri að ræða.

Flestir sýni stöðunni skilning en útgöngubann reynist mörgum þung­bært

Tvö hundruð og tuttugu manns dvöldu á sóttkvíarhótelinu við Þórunnartún í nótt. Í morgun bættist einn gestur við á hótelinu, en sá hafði komið frá skilgreindu hááhættusvæði í gegn um London. Upplýsingafulltrúi Rauða krossins segir flesta gesti sýna stöðunni skilning.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×