Innlent

Þór­ólfur segir úr­skurðinn mikil von­brigði fyrir ís­­lenska þjóð

Atli Ísleifsson skrifar
Þórólfur segir ljóst að sumir meti frelsi einstaklinga meira heldur en áhættuna fyrir þjóðina alla og lýðheilsuna.
Þórólfur segir ljóst að sumir meti frelsi einstaklinga meira heldur en áhættuna fyrir þjóðina alla og lýðheilsuna. Vísir/Vilhelm

„Staðan er náttúrulega þannig að það eru mikil vonbrigði þessi niðurstaða, finnst mér, fyrir íslenska þjóð að fá þennan dóm.“ Þetta segir Þórólfur Guðnason sóttvarnalæknir um niðurstöðu Héraðsdóms Reykjavíkur frá í gær. Hann ræddi við umsjónarmenn Bítisins á Bylgjunni í morgun, þar sem hann sagðist vilja að lögum yrði breytt.

Héraðsdómur Reykjavíkur komst að þeirri niðurstöðu í gær að gengið hafi lengra en sóttvarnalög heimiluðu þegar ákveðið var að skikka fólk að sæta fimm daga sóttkví í til þess gerðu sóttvarnarhúsi. Taldi dómurinn að til þess skorti reglugerð heilbrigðisráðuneytisins lagastoð. 

„Ég tel að þarna sé verið að koma í veg fyrir eina áhrifaríkustu aðgerðina sem verið er að gera til að reyna að koma í veg fyrir að þessi blessuð veira komist inn í landið og fari hérna yfir.

Við höfum verið að byggja þessar aðgerðir á staðreyndum, hvað við sjáum að er að, og reyna þannig að koma í veg fyrir að það geti gerst, að veiran komist hingað inn. Því miður hefur það verið þannig að fólk hefur ekki verið að halda sóttkví. Það er á þeim grunni að ég lagði þetta til að við myndum reyna að efla þetta eins og hægt væri,“ sagði Þórólfur.

Vill sjá að lögum verði breytt

Þórólfur segir að hann og fleiri hafi rætt málin og farið yfir stöðuna eftir að niðurstaða héraðsdóms lá fyrir. Hann segist sjálfur vilja að lögum verði breytt þannig að áfram verði hægt að grípa til þessara aðgerða.

„Það myndi ég halda að væri raunhæfa leiðin frá mínum sjónarhóli, að gera það. Þannig að við gætum haldið áfram á þessari braut að reyna að tryggja það að á meðan við erum að ná meiri útbreiðslu bólusetningar hér innanlands, að við reynum að koma í veg fyrir þetta. Ég held að þarna sé verið að fórna meiri hagsmunum fyrir minni, alveg klárlega, að mínu mati.“

Hlusta má á viðtal Bítismanna við Þórólf í heild sinni í spilaranum að neðan. 

Sumir metið frelsi einstaklingsins meira

Þórólfur segist ekki hneykslaður á því að fólk hafi ákveðið að fara þá leið að leita til dómstóla eftir að hafa verið gert að sæta sóttkví á sóttkvíarhóteli.

„Fólk lítur bara misjafnlega á málin og fólk metur hluti. Það eru sumir sem meta frelsi einstaklinga meira heldur en áhættuna fyrir þjóðina alla og lýðheilsuna. Það sýnist mér koma fram stundum. Ég held að [þetta] sé eina færa leiðin. Það er alveg vonlaust að fylgjast með fólki í sóttkví fyrir hið opinbera. Mörg hundruð manns. Það gengur ekki upp. Auðvitað er vonlaust að tékka á því hvort að fólk muni búa við viðunandi aðstæður fyrirfram. Það er heldur ekki hægt. 

Þannig að ég held að hafi verið langbesta leiðin og öruggasta leiðin. Auðvitað er hún ekki 100 prósent frekar en annað sem við erum að gera. En þetta held ég að hafi verið skásta leiðin. Ég held að það þurfi að skoða mjög vel, en auðvitað þarf lagagrundvöllurinn að vera í lagi. Það segir sig sjálft.“

Greinast enn utan sóttkvíar

Þórólfur segir að fjöldi tilfella hafi greinst nú yfir páskana. „Í heildina, á hverjum degi hafa verið svona fjórir, fimm sem hafa greinst. Langflestir í sóttkví, enda hafa margir verið í sóttkví. Við erum ennþá að greina fólk utan sóttkvíar, því miður. Það er ákveðið áhyggjuefni.“

Hann hafi miklar áhyggjur af þeirri staðreynd að fólki brjóti sóttkví sem mögulega leiði til nýrrar bylgju faraldurins hér á landi.

„Já, ég hef miklar áhyggjur af því. Auðvitað er það þannig að langflestir sem halda sína sóttkví og fara eftir þeim leiðbeiningum sem eru í gangi um sóttkví, en því miður þá er það þannig að við erum búin að sannreyna það að það þarf ekki nema nokkra, ekki nema einn, tvo, til að þetta gerist. Þá getum við fengið aðra bylgju í bakið.

Við sáum það með þriðju bylgjuna að það voru tveir einstaklingar sem héldu ekki sóttkví þar. Þá fengum við alla þriðju bylgjuna yfir okkur. Við höfum séð aðdragandann að því núna að nokkrir aðilar hafa ekki haldið sóttkvína og þá höfum við fengið dreifingu út í samfélagið.

Við höfum fram að þessu verið að sjá dreifingu í kringum nánasta umhverfi þeirra sem eru að koma inn í landið og hafa veri í sóttkví heima, þá höfum við séð tilfelli í kringum þau. Í nánustu fjölskyldu og ekki náð að dreifa sig mikið meira.

Núna erum við komin með meira smitandi afbrigði þannig að við erum að sjá meiri útbreiðslu og hættan er miklu meiri. Ef þetta fær að standa svona þá held ég að hættan sé mjög mikil að við fáum meiri útbreiðslu,“ sagði Þórólfur í Bítinu í morgun.


Tengdar fréttir

Rýnt í úrskurðinn: Reglugerðin gekk lengra en lög heimiluðu

Sóttvarnalæknir gekk lengra en sóttvarnalög heimiluðu með því að skikka fólk sem sannarlega hafði í hús að vernda hér á landi til að sæta fimm daga sóttkví í til þess gerðu sóttvarnarhúsi. Til þess skorti reglugerð heilbrigðisráðuneytisins lagastoð. 

Fólk hefur reynt að láta sækja sig upp á sótt­kvíar­hótel

Borið hefur á því að fólk á sóttkvíarhótelinu, sem taldi sig geta lokið sóttkví í heimahúsi, hafi reynt að láta vini eða ættingja sækja sig á hótelið. Héraðsdómur Reykjavíkur úrskurðaði í dag að þeir sem hefðu aðstöðu til að ljúka sóttkví á heimili sínu mættu það og væri ekki skylt að dvelja á sóttkvíarhóteli.

Gestum sótt­kvíar­hótels frjálst að ljúka sótt­kví annars staðar

Öllum sem dvelja á sóttkvíarhótelinu í Þórunnartúni er frjálst að ljúka sóttkví annars staðar, hafi þeir viðunandi aðstöðu til þess. Þetta kemur fram í tilkynningu sem send var frá Heilbrigðisráðuneytinu fyrir stuttu. Héraðsdómur Reykjavíkur úrskurðaði síðdegis í dag að ekki teldist lögmætt að skikka komufarþega frá áhættusvæðum í sóttkvíarhús.

Ekki má skikka fólk í sótt­kvíar­hús

Héraðsdómur Reykjavíkur hefur úrskurðað að ekki sé lögmætt að skikka komufarþega frá áhættusvæðum í sóttkvíarhús. Þrjár kærur voru teknar fyrir í héraðsdómi í dag og voru þær byggðar á því að um ólögmæta frelsissviptingu væri að ræða.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.