Tólf hávaðaútköll en flestir veitingastaðir með sóttvarnir á hreinu

Sylvía Hall skrifar 28. mars 2021 07:23

Lögreglan hafði eftirlit með veitingastöðum í gærkvöldi, enda strangar sóttvarnareglur í gildi. Vísir/Vilhelm

Lögreglan á höfuðborgarsvæðinu heimsótti 42 veitingastaði í miðbæ Reykjavíkur í gærkvöldi og voru þeir flestir með „allt á hreinu“ varðandi fjöldatakmarkanir og sóttvarnareglur. Um það bil þrjátíu staðir í öðrum hverfum voru einnig heimsóttir og var sama uppi á teningnum þar, þó árétta þurfti á nokkrum stöðum reglur um opnunartíma og skráningu gesta.

Þetta kemur fram í dagbók lögreglunnar á höfuðborgarsvæðinu, en nóg var um að vera hjá lögreglu í nótt. Frá klukkan ellefu í gærkvöldi til klukkan fimm í nótt var farið í tólf útköll vegna hávaða í heimahúsum og voru sex ökumenn stöðvaðir vegna gruns um akstur undir áhrifum áfengis eða fíkniefna.

Rétt eftir miðnætti barst tilkynning um umferðaróhapp í Árbæ þar sem ökumaður hafði misst stjórn á bifreið sinni og hafnaði hún á tré. Þrír voru í bílnum, ökumaður og tveir farþegar, og voru þau öll flutt með sjúkrabifreið á sjúkrahús til aðhlynningar. Ekki er vitað um áverka þeirra.

Frá klukkan fimm síðdegis í gær til klukkan níu í gærkvöldi bárust nokkrar tilkynningar um fok á höfuðborgarsvæðinu, þá sérstaklega frá byggingarsvæðum. Kamar fauk á byggingarsvæði í Kópavogi og þakplötur fuku af nýbyggingu í miðbæ Reykjavíkur svo fátt eitt sé nefnt. Þá fauk tólf metra skjólveggur frá húsi í Grafarvogi og var björgunarsveit kölluð til aðstoðar.

Þá var tilkynnt um eld í Hafnarfirði þar sem eldur hafði komið upp í sófa. Slökkvilið var kallað á vettvang og var búið að slökkva eldinn um tuttugu mínútum síðar.

Lögreglumál Samkomubann á Íslandi Veitingastaðir Reykjavík

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Mest lesið

Fleiri fréttir