500. landsleikurinn framundan: Eiður Smári hefur deilt efsta sæti markalistans með öðrum í 932 daga

Eiður Smári Guðjohnsen og Kolbeinn Sigþórsson eru tveir markahæstu leikmenn karlalandsliðs Íslands frá upphafi en báðir eru þeir með 26 mörk fyrir íslenska A-landsliðið. Eiður Smári hefur verið markahæstur síðan í október 2007 en Kolbeinn jafnaði við hann í markaskorun fyrir landsliðið í október árið 2019.

Eiður Smári skoraði mörkin sín í 88 leikjum en Kolbeinn er búinn að spila 60 landsleiki og er því með betra markahlutfall heldur en Eiður.

Eiður Smári og Kolbeinn hafa því deilt efsta sætinu síðan 14. október 2019 eða í 526 daga. Í viðbót voru Eiður Smári og Ríkharður Jónsson jafnir á toppnum í 406 daga eða frá því að Eiður jafnaði markamet Ríkharðs 2. september 2006 þar til að hann sló markametið 13. október 2007.

Eiður Smári hefur því deilt efsta sæti markalistans með öðrum í samtals 932 daga. Kolbeinn fær tækifæri til að binda enda á það í næstum leikjum landsliðsins.

Eiður Smári skoraði ekki í sex leikjum í röð eftir að hann jafnaði markametið. Kolbeinn hefur nú ekki skorað í sex landsleikjum í röð síðan að hann jafnaði met Eiðs Smára.

Ríkharður Jónsson átti markamet landsliðsins í 59 ár frá 1948 til 2007 en Eiður Smári hefur nú átt það í rúm fjórtán ár. Það eru bara fjórir leikmenn sem hafa átti markamet landsliðsins.

Albert Guðmundsson skoraði tvö fyrstu mörk A-landsliðsins á móti Noregi 1947, Ríkharður jafnaði við hann með tveimur mörkum á móti Finnum árið eftir og átti metið síðan einn eftir fernu á móti Svíum á Melavellinum 29. júní 1951.