Innlent

Ættu að geta farið ný­stikuðu leiðina á einum og hálfum tíma

Kristín Ólafsdóttir skrifar
Björgunarsveitarmenn frá Þorbirni sjást hér í aftakaveðri við stikun í dag. Leiðin sem þeir stikuðu sést merkt hér til hægri.
Björgunarsveitarmenn frá Þorbirni sjást hér í aftakaveðri við stikun í dag. Leiðin sem þeir stikuðu sést merkt hér til hægri. Samsett

Björgunarsveitin Þorbjörn hefur lokið við að stika gönguleið að gosstöðvunum í Geldingadal. Gönguleiðin hefst við Suðurstrandarveg og sveitin segir að vel búið göngufólk geti farið hana á einum og hálfum klukkutíma.

Gríðarmikil ásókn hefur verið í eldosið í Geldingadal um helgina. Gosið er mjög úr alfaraleið og erfiðar aðstæður hafa verið í nágrenni þess; vont veður og merkingar engar.

Björgunarsveitin Þorbjörn hefur þurft að aðstoða fjölmarga göngumenn sem villst hafa af leið eða verið orðnir kaldir og hraktir á langri göngu.

Allt í skrúfuna í gærkvöldi

„Það er einfaldlega þannig að við fengum þetta eldgos beint í fangið og á stað sem er mjög óaðgengilegur. Þangað liggja hvorki gönguleiðir né vegslóðar sem gerir þetta verkefni mun flóknara fyrir okkur. Ofan á þetta hefur verið mjög hvasst og leiðinlegt veður,“ segir björgunarsveitin í færslu á Facebook í kvöld.

„Á meðan við höfum verið að ná utan um ástandið hefur fólk í þúsundatali lagt leið sína á svæðið. Okkur þykir það mjög skiljanlegt og við vildum að við gætum tekið betur á móti öllum. Í gærkvöldi fór svo allt í skrúfuna og fólki gekk illa að komast frá eldgosinu sem endaði með fjölda örmagna fólks sem þurfti á aðstoð okkar að halda. Við vildum óska þess að staðan væri betri og viljum koma því á framfæri hér með að við björgunarsveitarfólk erum einfaldlega sjálfboðaliðar sem hlaupa undir bagga með ýmsum aðilum þegar á reynir. Við tökum ekki ákvarðanir um lokanir né skilgreind hættusvæði, stofnanir og lögregla gera það.“

Hér má sjá gönguleiðina sem flestir mæla með að gosstöðvunum í Geldingadal. Sú leið hefur nú verið stikuð.Vísir/Loftmyndir ehf

Sjö kílómetrar fram og til baka

Síðdegis í dag fór tíu manna hópur björgunarsveitarmanna upp á Fagradalsfjall í aftakaveðri og stikaði þægilega gönguleið að gosinu fyrir þá sem vilja berja það augum.

„Nú er hægt að ganga stikaða slóð frá Suðurstrandavegi að gosstöðvunun á mjög þægilegan máta og tekur um eina og hálfa klukkustund fyrir vel búið fólk að ganga þá leið en hún er um 3.5 km eða 7 km fram og til baka,“ segir í færslu Þorbjarnar. 

Leiðin liggur frá Suðurstrandarvegi upp að Nátthagakrika og hækkunin um 300 metrar, samkvæmt upplýsingum frá Landsbjörg fyrr í dag.

Vegna eldgosins í Fagradalsfjalli Það eru nokkur atriði sem Björgunarsveitin Þorbjörn vill koma á framfæri í tengslum...

Posted by Björgunarsveitin Þorbjörn on Mánudagur, 22. mars 2021

Fólk er þó beðið að fara varlega, fylgjast með veðurspá og vera vel búið til göngunnar. Þá megi búast við því að vind lægi en þá eykst hættan á gasmengun verulega.

„Það er vegna þess að gígurinn er í mikilli lægð og þegar vindurinn blæs ekki gasinu frá leggst það ofan í lægðina. Að endingu viljum við vinsamlegast biðja fólk um að vera ekki að ganga ofan á nýja hrauninu, það er einfaldlega stórhættulegt!“

Svona verður opnuninni háttað á Suðurstrandarvegi.Vegagerðin

Vegagerðin boðaði í dag að Suðurstrandarvegur, sem staðið hefur lokaður síðan 18. mars, verði opnaður með takmörkunum í kvöld, sem sjást á myndinni hér fyrir ofan. Vegurinn er þó enn lokaður allri almennri umferð milli Grindavíkur og gatnamóta við Krýsuvíkurveg, að því er fram kemur í tilkynningu frá Vegagerðinni um tíuleytið í kvöld. Þá er vert að taka fram að almannavarnir hafa lokað gossvæðinu og er sú lokun enn í gildi.


Tengdar fréttir

Að­stoðuðu á annað hundrað manns í gær­kvöldi og í nótt

Þrátt fyrir lokanir björgunarsveita og lögreglu að eldgosinu reyndi fólk að komast að svæðinu í dag. Björgunarsveitir og lögregla aðstoðuðu vel á hundrað manns sem reyndu að berja eldgosið augum í gærkvöldi og í nótt. Fjörutíu leituðu á fjöldahjálparstöð í Grindavík.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.