Lík fótboltamanns fannst eftir tveggja daga leit

Franco Acosta var aðeins 25 ára gamall en hann er fyrrum leikmaður Villarreal og Racing Santander á Spáni.

Á laugardagskvöldið þá reyndi Franco Acosta að synda yfir Arroyo Pando ánna í Canelones sýslu en hann var þá á ferðinni með bróður sínum.

Bróðir hans sótti sér hjálp eftir Franco skilaði sér ekki yfir á hinn bakkann og leit hófst strax. Lík Franco fannst hins vegar ekki fyrr en tveimur dögum síðar.

Franco Acosta spilaði fyrir yngri landslið Úrúgvæ og var meðal annars með á HM 20 ára liði árið 2015. Í framhaldinu fékk hann samning hjá spænska félaginu Villarreal. Hann  hafði þá skorað 12 mörk í 17 leikjum með sautján ára landsliðinu og sex mörk í fjórtán landsleikjum með tuttugu ára landsliðinu.

Villarreal lánaði hann í sex mánuði til Racing Santander en árið 2018 snéri hann aftur heim til Úrúgvæ.

Acosta spilaði fyrst fyrir Boston River og svo með Plaza Colonia. Á síðustu leiktíð var hann aftur á móti kominn í b-deildarlið Atenas San Carlos.

Knattspyrnusamband Úrúgvæ minntist leikmannsins og sendi fjölskyldu, vinum og liðsfélögum Franco Acosta samúðarkveðjur.

Spænska félagið Villarreal minntist hans einnig á samfélagsmiðlum sínum sem og Racing Santander.