Kvik­mynda­gerðar­mennirnir vilja fá þrjár milljónir króna frá hinum reiða föður

Guðmundi Þór er stefnt fyrir dóm vegna harðra og ófagra orða um þá Anton Mána og Guðmund Arnar; fullyrðir að þeir hafi hlunnfarið son sinn 14 ára og svikið um hlutverk kvikmynd sem þeir Anton Máni og Guðmundur Arnar gerðu. Farið er fram á að fjöldi ummæla sem höfð hafa verið eftir Guðmundi Þór verði dæmd dauð og ómerk og farið er fram á miskabætur; 1,5 á mann samtals 3 milljónir.

„Eftir ítrekaðar tilraunir til sátta sáu umbjóðendur mínir sig tilneydda til að leita réttar síns vegna fjölmargra alvarlegra aðdróttana og ærumeiðandi ummæla sem stefndi viðhafði í fjölmiðlum um umbjóðendur mína síðastliðið sumar. Því miður var þetta niðurstaðan en umbjóðendur mínir geta ekki setið þegjandi undir því þegar vegið er að mannorði þeirra, æru og starfsheiðri með ósönnum staðhæfingum um störf þeirra, líkt og stefndi hefur gert,“ segir lögmaður þeirra Arnar Kormákur Friðriksson í samtali við Vísi.

Vildi vara foreldra við þessum gylliboðum

Guðmundur Þór er sjálfur kvikmyndagerðarmaður og ljósmyndari. Hann hefur haldið því fram fullum fetum að aðstandendur verðlaunamyndarinnar Hjartasteins hafi svikið 14 ára gamlan son sinn um bæði laun og hlutverk. Drengurinn hafi lagt á sig hálfs ár vinnu í undirbúningi fyrir aðalhlutverk í kvikmyndinni en mátt sitja eftir með sárt ennið, svikinn um hlutverkið og ekki fengið krónu greidda fyrir alla þá vinnuna sem hann lagði á sig.

Málið vakti mikla athygli á sínum tíma enda dró Guðmundur hvergi af sér og vildi vara við þessum mönnum, leikstjóra og framleiðanda myndarinnar sem hann sagði vera íslenskri kvikmyndagerð til skammar. Hann varar foreldra við gylliboðum mannanna. 

„Sem faðir hryggir það mig að hafa leyft þessum mönnum að ávinna sér traust sonar míns og glepja hann með tali um frægð og frama þar sem öllu fögru var lofað. Það átti að ferðast um heiminn með myndina á kvikmyndahátíðir, gista á lúxushótelum og leikarar úr Hjartasteini voru fengnir til að koma og segja syni mínum hvað það hefði verið frábært tækifæri fyrir þá að vinna í svona verkefni,“ sagði Guðmundur á sínum tíma og gaf engan afslátt á því hverskonar hroki, fláræði og yfirgangur einkenndi þessa menn.

Vildu skriflega yfirlýsingu um að ummælin væru röng

Anton Máni sagði allt þetta algerlega úr lausu lofti gripið; drengurinn hafi fengið greitt fyrir sína vinnu og alltaf hafi legið fyrir að enginn gæti gengið að hlutverki í myndinni vísu.

Gunnar Ingi, lögmaður Guðmundar Þórs Kárasonar, segir að fyrir hafi legið kröfur, mennirnir vildu skriflega yfirlýsingu um að hann hafi ekki mátt segja það sem hann sagði. En Guðmundur Þór telji sig einfaldlega hafa frelsi til að tjá sig um málið. Fjölmiðlaumfjöllun hafi verið nokkur, eðlilega því þarna er um að ræða kvikmynd sem gerð var fyrir hundruði milljóna af almannafé og hvernig staðið er að slíku verkefni hljóti að eiga erindi við almenning.