Innlent

Vikið úr ráðum borgarinnar í kjöl­far um­mæla sinna um borgar­stjóra

Eiður Þór Árnason skrifar
Ólafur Guðmundsson, varaborgarfulltrúi Sjálfstæðisflokksins.
Ólafur Guðmundsson, varaborgarfulltrúi Sjálfstæðisflokksins. Samsett

Ólafur Guðmundsson, varaborgarfulltrúi Sjálfstæðisflokksins, mun víkja úr þeim ráðum sem hann situr í hjá borginni. Þetta staðfestir Eyþór Arnalds, oddviti Sjálfstæðisflokksins í Reykjavík, í samtali við fréttastofu.

Ólafur er varamaður fyrir Sjálfstæðisflokkinn í skipulags- og samgönguráði, öldungaráði og innkaupa- og framkvæmdaráði Reykjavíkurborgar. Tillaga Sjálfstæðismanna um að Ólafi verði skipt út var lögð fram í dag og verður tekin fyrir á fundi borgarstjórnar á þriðjudag.

Ummæli varaborgarfulltrúans í tengslum við fréttir af skotárás á fjölskyldubíl Dags B. Eggertssonar borgarstjóra hafa vakið hörð viðbrögð en Ólafur baðst afsökunar á þeim í dag og dró þau til baka. 

Fordæmir ummælin

„Þetta er eitthvað sem við viljum ekki hafa og við viljum sýna fordæmi með því að taka á þessum málum. Við sjáum að það er allskonar umræða á netinu í öllum flokkum og við sem samfélag þurfum að taka okkur betur á,“ segir Eyþór.

Hann segir að Ólafur muni ekki starfa í nefndum borgarinnar á næstunni og að allir aðilar hafi sammælst um að þetta væri besta lausnin á málinu. 

Hildur Björnsdóttir, varaoddviti Sjálfstæðisflokksins í Reykjavík, hafði áður farið fram á það að Ólafi yrði gert að hætta trúnaðarstörfum fyrir flokkinn í borginni.

Eyþór segist fordæma skotárásir á húsnæði stjórnmálaflokka og bíl borgarstjóra og vonast til að stjórnmálamenn og aðrir Íslendingar haldi áfram að finna fyrir miklu öryggi hér á landi.

Fólk eigi ekki að þurfa að óttast um öryggi sitt

Forsætisnefnd Reykjavíkurborgar fordæmdi sömuleiðis í dag árásir á höfuðstöðvar stjórnmálaflokka og bifreið borgarstjóra og sagðist líta þær mjög alvarlegum augum. 

Þá kom fram í ályktun nefndarinnar að gæta verði hófs í umræðu um kjörna fulltrúa og friðhelgi einkalífs þeirra virt.

„Því miður hafa margir kjörnir fulltrúar áður fengið hótarnir vegna starfa sinna. Allt slíkt ofbeldi er aðför að okkar frjálsa, lýðræðislega samfélagi og með öllu óásættanlegt. Forseta er falið að ræða við borgarritara og lögregluryfirvöld og grípa til nauðsynlegra ráðstafana til að tryggja öryggi kjörinna fulltrúa. Gæta verður hófs í umræðu um kjörna fulltrúa og friðhelgi einkalífs þeirra virt. Við viljum ekki samfélag þar sem fólk sem helgar sig samfélagsmálum þurfi að óttast um öryggi sitt,“ sagði í ályktuninni.

Hildur Björnsdóttir, varaoddviti Sjálfstæðisflokksins í Reykjavík, og Katrín Atladóttir, borgarfulltrúi flokksins, voru meðal þeirra sem gagnrýndu ummæli Ólafs í dag.

„Sorgleg ummæli hjá honum. Enginn á að þola hótanir og árásir sem þessar í opnu og frjálsu samfélagi. Við eigum öll sem eitt að fordæma þær,“ sagði Katrín.

Ætlar að heyra í Degi 

Sjálfur hefur Ólafur sagt að ummælin sín hafi verið vanhugsuð.

„Rétt áður en ég slökkti á tölvunni flaug þetta eitthvað í hugann á mér. Ég skrifaði þetta niður á Facebook. Þetta sýnir bara hvernig Facebook og samfélagsmiðlarnir eru. Það sem maður segir fer fyrir allra augu. Þetta var alls ekki illa meint. Ég sé eftir því að hafa gert þetta. Henti þessu út. Dreg þetta til baka og bið Dag B. Egggertsson innilega afsökunar á að hafa gert þessi mistök,“ sagði Ólafur í samtali við fréttastofu fyrr í dag. Þá sagðist hann vera búinn að semja bréf til Dags og ætla að hringja í hann í kjölfarið.

Fréttin hefur verið uppfærð.


Tengdar fréttir

Borgarstjóri fellur ekki undir lög um vernd æðstu stjórnar

Áslaug Arna Sigurbjörnsdóttir dómsmálaráðherra segist hafa rætt við og fundað með Sigríði Björk Guðjónsdóttur ríkislögreglustjóra vegna skotárásar á bíl Dags B. Eggertssonar borgarstjóra sem lögregla hefur til rannsóknar. Áslaug Arna lítur málið alvarlegum augum.

„Orðræðan er mjög harkaleg og oft hatursfull“

„Ég fordæmi þessa árás og finnst hún alvarleg, því þarna er verið að beita skotvopnum fyrir utan heimili stjórnmálamanns. Ég lít þetta alvarlegum augum,“ segir Katrín Jakobsdóttir forsætisráðherra um skotárás á bíl borgarstjóra um liðna helgi sem lögregla hefur til skoðunar.

Degi afar brugðið vegna skotárásarinnar

Degi B. Eggertssyni borgarstjóra er afar brugðið vegna skotárásarinnar. Lögreglan hefur vaktað hús borgarstjóra frá því málið kom upp en hún hefur fundið byssukúlur í hurð bíls hans.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.