Sjáðu Hús ís­lenskunnar taka á sig mynd

Framkvæmdir við Hús íslenskunnar hafa gengið vel það sem af er ári, þrátt fyrir afleitt vetrarveður og heimsfaraldur kórónuveiru. Kjallari og fyrsta hæð hússins eru nú risin að mestu en uppbyggingin milli mánaða sést vel í meðfylgjandi myndbandi sem tekið er úr lofti.

Í tilkynningu um framkvæmdirnar á vef Framkvæmdasýslu ríkisins segir að þær séu á áætlun þó að illviðri hafi heldur dregið úr framkvæmdahraða í desember, janúar febrúar og mars. Undanfarnar vikur hafi fyrsta hæðin litið dagsins ljós „og sporöskjulaga form byggingarinnar farið að sýna sig.“

Framkvæmdir hófust síðastliðið haust þegar hafist var handa við að steypa kjallara, bílakjallara og undirstöður undir tjörn sem umlykja mun húsið. Nú er svo komið að fyrsta hæðin er svo til fullsteypt og unnið er að því að járnabinda gólfplötu 2. hæðar, að því er segir í tilkynningu.

Gert er ráð fyrir að húsið verði tilbúið haustið 2023 og starfsemi Árnastofnunar og íslenskudeildar Háskóla Íslands muni þá geta flutt inn.

Í myndbandinu hér að neðan má sjá þróun byggingarinnar frá áramótum til loka apríl.