Læknir Dave Grohl flutti lag á tónleikum Foo Fighters

Bæklunarlæknar eru til alls líklegir, í það minnsta bæklunarlæknar stjarnanna eins og Dr. Lew Schon sannaði á nýafstöðnum tónleikum Foo Fighters í Fenway Park á dögunum.

Dr. Schon er einn þeirra lækna sem önnuðust forsprakka sveitarinnar, Dave Grohl, eftir að hann hrundi af sviði fyrr á árinu með þeim afleiðingum að hann braut á sér hægri fótlegginn. Neyddist sveitin til að aflýsa fjölda tónleika í kjölfarið og hefur söngvarinn þurft að styðjast við hjólastól eða stærðarinnar hásæti á tónleikum Foo Fighters allar götur síðan.

Alla jafna hafa skírskotanir í fótbrot forsprakkans vakið mikla lukku á tónleikum Foo Fighters en gera má ráð fyrir því að uppákoman á Fenway Park hafi sprengt öll met.

Dr. Schon steig þá á stokk með sveitinni, ekki með tambórínu eða kúabjöllu í hönd heldur leiddi hann söng við lagið Seven Nation Army sem The White Stripes gerðu ódauðlegt hér um árið.

Ef marka má viðbrögð áhorfenda og netmiðla leystist honum verkið vel úr (læknis)hendi en hlýða má á söng doktorsins hér að neðan.