Kringlan hlýtur alþjóðleg markaðsverðlaun

Kringlan bar sigur úr býtum, í flokknum „nýr auglýsingamiðill“ fyrir árið 2013 hjá Alþjóðlegum samtökum verslunarmiðstöðva, ICSC, fyrir appið Kringlukröss, en þau voru afhent við hátíðlega athöfn í Amsterdam.

ICSC verðlaunar árlega verslunarmiðstöðvar um heim allan fyrir árangursríkustu markaðsherferðir og frumlegustu leiðirnar og þykir Kringlan hafa náð besta árangri evrópskra verslunarmiðstöðva á síðasta ári fyrir Kringlukrössið er app fyrir snjallsíma, fartölvur og Facebook.

Gamatic sá um hönnum og tæknilega útfærslu en markmiðið er að raða saman kúlum af sama lit og verða sér út um afslátt hjá verslunum og fyrirtækjum í Kringlunni. Því fleiri kúlum sem notandinn nær, því hærri verður afslátturinn. Um 40.000 Íslendingar sóttu Kringlukröss og tæplega 650.000 leikir voru spilaðir.

„Þessi verðlaun hafa mikla þýðingu fyrir Kringluna. Þau sýna meðal annars að við erum að gera hluti sem standast samanburð á alþjóðlegum vettvangi enda er ICSC fagráð með yfir 55 þúsund fyrirtæki sem meðlimi í ríflega 90 löndum. Þetta er staðfesting á því fyrir viðskiptavini og starfsfólk að Kringlan er að gera hluti sem standast samanburð við það besta í heiminum,“ segir Sigurjón Örn Þórsson, framkvæmdastjóri Kringlunnar.

 Vegna gríðarlegra vinsælda er ljóst að ný útgáfa af Kringlukröss mun líta dagsins ljós á næstunni. „Það er sérlega ánægjulegt að hljóta alþjóðleg markaðsverðlaun fyrir Kringlukröss. Um er að ræða algjöra nýjung í markaðssetningu og það er spennandi að Kringlan sé leiðandi á þessu sviði. Samstarfið við fyrirtæki í Kringlunni sem buðu fram vörur og verðlaun skilaði þessum frábæra árangri. Þakkirnar eru því til þeirra sem og viðskiptavina okkar sem kunnu svo sannarlega að meta þessa nýjung. Það er okkur mikil hvatning að gera góða hluti vel,“ segir Baldvina Snælaugsdóttir, markaðsstjóri Kringlunnar.