Fylkir semur við leikmenn

Fjórir lykilmenn hjá Fylki skrifuðu undir nýja samninga við félagið. Haukur Ingi Guðnason, Helgi Valur Daníelsson, Eyjólfur Héðinsson og Hrafnkell Helgason gerðu allir þriggja ára samning við Árbæjarliðið en þeir voru allir orðaðir við önnur lið í Landsbankadeildinni. Aðeins tveir leikmenn Fylkis eru ennþá samningslausir, þeir Valur Fannar Gíslason og Kristján Valdimarsson. Haukur Ingi hefur lítið leikið með Fylki vegna krossbandaslits eftir að hann gekk til liðs við félagið fyrir tveimur árum frá Keflavík en hinir þrír eru uppaldir Fylkismenn. Þá skrifaði Jón Sveinsson undir 3ja ára samning sem aðstoðarþjálfari Leifs Garðarssonar sem þjálfar Fylki næstu þrjú árin. "Mér líður mjög vel hér í Árbænum. Fylkismenn eru stórhuga og stefna hátt á næstu árum. Þeir eru líka búnir að standa vel við bakið á mér þann tíma sem ég er búinn að eiga við erfið meiðsli að stríða og mér fannst að ég skuldaði þeim að vissu leyti að vera hér áfram," sagði Haukur Ingi við Fréttablaðið. Hörður Antonsson, formaður meistaraflokksráðs Fylkis, sagði það sérstaklega ánægjulegt að hafa gert nýja samninga við þessa fjóra leikmenn. Þetta væri stóráfangi fyrir Fylki, sem ætlaði sér stóra hluti næsta sumar."Þriggja ára samningur er vissulega mikil skuldbinding. Við stefnum að því að vera í allra fremstu röð og byrja strax á næsta ári. Ef það tekst ætla ég ekki að hætta strax um haustið. Þá líst mér vel á Leif sem þjálfara. Hann hefur gert góða hluti í Hafnarfirði með Ólafi [Jóhannessyni] og kemur úr þannig umhverfi þar sem náðist góður árangur og þess vegna ætti hann að þekkja hvað til þarf," sagði Haukur. En hvað vantar upp á að Fylkir berjist fyrir alvöru um Íslandsmeistaratitil?"Þetta er stór og erfið spurning. Fyrst og fremst hefur vantað stöðugleika. Ég tel að mannskapurinn sé nógu góður til að berjast um Íslandsmeistaratitil ef allir eru heilir. Það þarf að búa til sterka liðsheild og byrja strax á því á undirbúningstímabilinu," sagði Haukur.Nýráðinn þjálfari Fylkis, Leifur Garðarsson, var himinlifandi að tryggja undirskrift fjórmenninganna. Aðspurður hvort von væri á nýjum andlitum í Árbæinn sagði Leifur að allir góðir fótboltamenn væru velkomnir í Fylki. "Ég tel hins vegar mikilvægast að tryggja okkur þá leikmenn sem eru með lausa samninga í félaginu og í dag stigum við stórt skref í þá átt." Fylkismenn söknuðu Vals Fannars Gíslasonar á blaðamannafundinum í gær en hann er samningslaus. Valur Fannar sagði í samtali við Fréttablaðið að það væri ekkert í gangi hjá sér. "Ég vildi einfaldlega ekki skrifa strax undir en mér finnst ólíklegt að ég spili fyrir annað lið á Íslandi en Fylki. Ég er einfaldlega að velta nokkrum hlutum fyrir mér og kanna málin, við sjáum til hvað kemur út úr því."